ལེགས་པར་བཤད་པ་རིན་པོ་ཆེའི་གཏེར་ལས་བླུན་པོ་བརྟག་པ་སྟེ་རབ་ཏུ་བྱེད་པ་གསུམ་པ།

发布时间:2018-05-18 10:55:21

སྐྱེ་བོ་ངན་པ་འབྱོར་ཐོབ་ཀྱང༌།

ལྷག་པར་སྤྱོད་པ་ངན་པར་འགྱུར།

འབབ་ཆུ་ཇི་ལྟར་ལྡོག་གྱུར་ཀྱང༌།

ཐུར་དུ་འབབ་པ་ཁོ་ནར་འདོད།

 

དམན་ལ་སྤྱོད་པ་བཟང་བྱུང་ཡང༌།

དེ་ནི་བཅོས་མའི་རྣམ་ཐར་ཡིན།

ཤེལ་ལ་ནོར་བུས་ཁ་བསྒྱུར་ཡང༌།

ཆུ་དང་ཕྲད་ན་རང་མདོག་སྟོན།

 

བླུན་པོས་བྱ་བ་ལེགས་གྲུབ་ཀྱང༌།

སྟེས་དབང་ཡིན་གྱི་བསྒྲུབས་པས་མིན།

སྲིན་བུའི་ཁ་ཆུ་དར་སྐུད་དུ།

འགྲོ་བ་མཁས་ནས་བྱུང་བ་མིན།

 

ཆེན་པོས་འབད་ནས་བསྒྲུབས་པའི་གྲོས།

ངན་པ་སྐད་ཅིག་གཅིག་ལ་འཇོམས།

ཞིང་པས་ལོ་ཟླར་འབད་པའི་ཞིང༌།

སེར་བས་སྐད་ཅིག་རྡུལ་དུ་རློག

 

ངན་པ་ཕལ་ཆེར་རང་གི་སྐྱོན།

གང་ཡིན་གཞན་ལ་འགོད་པར་བྱེད།

ཁྭ་ཏས་མི་གཙང་ཟོས་པའི་མཆུ།

ས་གཙང་གཞན་ལ་འབད་ནས་འབྱིད།

 

བླུན་པོ་བྱ་བ་ལ་སྦྱར་ན།

དོན་ཉམས་དེ་ཡང་ཉམས་པར་འགྱུར།

ཝ་སྐྱེས་རྒྱལ་པོར་བསྐོས་པ་ཡིས།

འཁོར་སྡུག་རང་ཡང་བསད་ཅེས་གྲགས།

 

རྨོངས་པ་བདེ་བ་འདོད་བཞིན་དུ།

བྱ་བ་སྡུག་བསྔལ་འབའ་ཞིག་སྒྲུབ།

གདོན་གྱིས་བཏབ་པའི་སྐྱེ་བོ་འགའ།

སྡུག་བསྔལ་སྤང་ཕྱིར་ལྕེབས་པ་མཐོང༌།

 

བློ་ངན་དྲང་པོ་ལ་ལ་རང༌།

བརླག་འགྱུར་ལ་ལ་གཞན་ལ་གནོད།

ནགས་ཀྱི་ཤིང་དྲང་རྩད་ནས་གཅོད།

མདའ་ཡི་དྲང་པོས་ཕ་རོལ་གསོད།

 

རྟག་ཏུ་གཞན་དོན་མི་སེམས་པ།

དེ་ཡི་སྤྱོད་པ་ཕྱུགས་དང་མཚུངས།

བཟའ་བཏུང་འབའ་ཞིག་དུད་འགྲོས་ཀྱང༌།

བསྒྲུབ་པར་ནུས་པ་མ་ཡིན་ནམ།

 

ཕན་དང་མི་ཕན་མི་དཔྱོད་ཅིང༌།

བློ་དང་ཐོས་པ་མི་བསྒྲུབ་པར།

ལྟོ་འགྲངས་འབའ་ཞིག་དོན་གཉེར་བ།

སྤུ་མེད་པ་ཡི་ཕག་པ་ཡིན།

བླུན་པོའི་དབུས་ན་དགའ་ཞིང་བརྩེ།

མཁས་པའི་མདུན་ན་ཞུམ་ཞིང་འཛུར།

ནོག་དང་ལྐོག་ཤལ་མེད་ན་ཡང༌།

ཡ་སོ་ཅན་གྱི་བ་ལང་ཡིན།

 

གང་ན་བཟའ་བཏུང་ཡོད་དེར་རྒྱུག

དགོས་པའི་བྱ་བ་བཅོལ་ཡང་འབྲོས།

གཏམ་དང་བཞད་གད་ཤེས་ན་ཡང༌།

མཇུག་མ་མེད་པའི་ཁྱི་རྒན་ཡིན།

 

རྨིག་རྗེས་ཆུ་ཡིས་དགང་སླ་སྟེ།

མཛོད་ཆུང་ནོར་གྱིས་དགང་བ་སླ།

ཞིང་ཆུང་ས་བོན་གདབ་སླ་སྟེ།

བློ་ཆུང་རིག་པ་མགུ་བ་སླ།

 

དྲེགས་བཅས་བླུན་པོ་ཁས་ལེན་ཅན།

ཆེན་པོ་ཡིན་ཡང་ཉམས་པར་འགྱུར།

གོམ་པ་གང་གི་ས་བྱིན་པས།

སྟོབས་ལྡན་གྱིས་ནི་ས་གསུམ་ཤོར།

 

བློ་ཆུང་སེམས་ལ་ཁོན་འཛིན་ཅན།

གནོད་པ་བས་ཀྱང་རྣམ་འགྱུར་སྔ།

ཁྱི་ངན་དགྲ་བོ་མཐོང་བ་ན།

རྨུགས་པའི་ཐོག་མར་ཀུ་ཅོ་འདོན།

 

བླུན་པོས་བསགས་པའི་སྡུག་བསྔལ་ཉིད།

མྱོང་གི་སྤྱོད་པའི་བདེ་མི་མྱོང༌།

ཡང་ཡང་མྱུལ་ཞིང་ལྟ་བ་ཡི།

འཇུངས་པའི་ནོར་ནི་བྱི་བ་འདྲ།

 

བླུན་པོའི་དྲུང་དུ་མཁས་པ་བས།

སྤྲེའུ་འཛིན་པ་ཁྱད་པར་འཕགས།

སྤྲེལ་འཛིན་ཟས་དང་ནོར་གྱིས་མཆོད།

མཁས་པ་ལག་པ་སྟོང་པར་འགྲོ།

 

ཡོན་ཏན་མེད་པའི་སྐྱེ་བོ་རྣམས།

ཡོན་ཏན་ཅན་ལ་ལྷག་པར་སྡང༌།

གངས་ཀྱི་ཡུལ་དུ་དགུན་སྐྱེས་པའི།

ལོ་ཏོག་ལྟས་ངན་ཡིན་ཞེས་སྒྲོགས།

 

ཡོན་ཏན་ལོག་པར་སྦྱངས་པ་འགའ།

ལེགས་པར་སྦྱངས་པ་ཁྱད་དུ་གསོད།

ལྦ་བ་མེད་པའི་གླིང་ཕྲན་འགར།

ཡན་ལག་ཉམས་པའི་སྐྱོན་དུ་བྱེད།

 

ཆོ་ག་ཉམས་པར་བྱེད་པ་རྣམས།

ཆོ་ག་ཚང་བར་བྱེད་ལ་བརྙས།

ཙུ་ཏའི་ཐུལ་དུ་ཕྱིན་པ་ན།

རྐང་གཉིས་པ་ལ་མིར་མི་བརྩི།

 

ཆོ་ག་ལོག་པར་བསྒྲུབ་པ་འགའ།

ཡང་དག་ཆོ་ག་བྱེད་ལ་གཤེ།

སྐྱེས་བྱ་ཁྱི་ཡི་མགོ་ཅན་རྣམས།

བཞིན་བཟང་བུད་མེད་ཡིན་ཞེས་བརྙས།

 

ལོག་འཚོའི་ཟས་ནོར་རྙེད་པ་འགའ།

མཁས་པ་དབུལ་པོ་ཁྱད་དུ་གསོད།

སྤྲེལ་རྒན་རྣམས་ཀྱིས་མི་བཟུང་ནས།

མཇུག་མ་མེད་ཅེས་བཞད་གད་བྱེད།

དེས་ན་ལས་ཀྱིས་མནར་བས་ན།

མཁས་པ་བླུན་པོའི་ནང་དུ་འཁྱམས།

རླུང་གིས་བདས་པའི་མ་ལི་ཀ།

དྲི་ཞིམ་ཕྱག་བདར་ཁྲོད་ན་བརྫི།

 

སྐྱོན་རྣམས་འབད་པས་འཛིན་བྱེད་ཅིང༌།

ཡོན་ཏན་རྩ་ནས་མི་ཆགས་པ།

སྐྱེས་བུ་ངན་པ་ཆུ་ཚགས་བཞིན།

ངན་པ་འཛིན་གྱི་བཟང་པོ་འཆོར།

 

ལེགས་ཉེས་དཔྱོད་པའི་བློ་གྲོས་མེད།

མཁས་པའི་མདུན་སར་ཕྱིར་ཕྱོགས་སྐྲོད།

ཟས་ནོར་ཁོ་ནའི་གཏམ་གྱིས་འདའ།

རྐང་གཉིས་པ་ཡི་ཕྱུགས་སུ་བཤད།

 

བློ་ཆུང་མང་དུ་འདུས་ན་ཡང༌།

བྱ་བ་ཆེན་པོ་བསྒྲུབ་མི་ནུས།

རྩི་རྐྱང་མང་དུ་བསྡམས་ན་ཡང༌།

ཁང་པའི་གདུང་མ་བཟོད་པར་དཀའ།

 

མ་དཔྱད་པ་ལས་དོན་གྲུབ་པ།

བྱུང་ཡང་མཛངས་པར་སུ་ཞིག་བརྩི།

སྲིན་བུ་དག་གིས་ཟོས་པའི་རྗེས།

ཡི་གེར་བྱུང་ཡང་ཡིག་མཁན་མིན།

 

 

བློ་གྲོས་ཞན་པའི་འདོད་གཏམ་དང༌།

ཅང་ཤེས་མིན་པའི་རྟ་མཆོག་དང༌།

གཡུལ་ངོར་ལྷུང་བའི་རལ་གྲི་རྣམས།

སུ་ཡི་གྲོགས་འགྱུར་ངེས་པ་མེད།

 

ཤེས་རབ་མེད་པའི་བླུན་པོ་རྣམས།

མང་ཡང་དགྲ་ཡི་དབང་དུ་འགྲོ།

གླང་ཆེན་སྟོབས་ལྡན་ཁྱུར་ལོངས་པ།

རི་བོང་བློ་ལྡན་གཅིག་གིས་བཏུལ།

 

ཤེས་རབ་མེད་པའི་ལོངས་སྤྱོད་ཀྱང༌།

ཕལ་ཆེར་རང་ལ་ཕན་པ་ཏུང༌།

འདོད་འཇོ་བ་ཡི་འོ་མ་ཡང༌།

བེ་འུས་འཐུང་བ་བརྒྱ་ལམ་ཡིན།

 

བླུན་པོ་རྣམས་ཀྱིས་མཁས་པ་ཡང༌།

མཆོད་པར་འགྱུར་བའི་ངེས་པ་མེད།

ཉི་མ་ཤིན་ཏུ་འོད་གསལ་ལ།

འབྱུང་པོའི་གདོན་རྣམས་མི་འབྲོས་སམ།

 

བླུན་པོ་ལོངས་སྤྱོད་གསོག་རྣམས་ལ།

གཉེན་གྱི་བསམ་པ་ག་ལ་ཡོད།

སྡིག་སྡུག་གཏམ་ངན་ཁོ་ན་ཡིས།

བྱི་བ་བཞིན་དུ་བསགས་ནས་འཆི།

སྐྱེ་བོ་ངན་པའི་ཚོགས་ནང་དུ།

ཡོན་ཏན་ལྡན་ཡང་ག་ལ་འཁུར།

སྦྲུལ་གདུག་གནས་པའི་ས་ཕྱོགས་སུ།

སྒྲོན་མེ་གསལ་ཡང་འོད་མི་འབྱིན།

 

ལོངས་སྤྱོད་མོད་ཀྱང་ལས་ངན་གྱིས།

འཇུངས་པས་སྤྱོད་པའི་རང་དབང་མེད།

རྒྱུན་འབྲུམ་སྨིན་པ་ཟ་བའི་ཚེ།

ཁྭ་ལ་མཆུ་ནད་རྒྱུན་དུ་འབྱུང༌།

 

རྒྱུན་དུ་གཞན་གྱིས་སྐྱོང་དགོས་པའི།

སྐྱེ་བོ་ནམ་ཞིག་ཅི་ནས་ཉམས།

བྱ་རོག་གིས་ནི་བཟུང་བ་ཡི།

རུས་སྦལ་ས་ལ་ལྷུང་ཞེས་གྲགས།

 

བཟང་ངན་མི་ཤེས་དྲིན་བྱས་བརྗེད།

ངོ་མཚར་གཏམ་ལ་མཚར་མི་འཛིན།

མངོན་སུམ་མཐོང་བ་སླར་ཡང་འདྲི།

ཞུམ་ཞིང་རྗེས་འབྲང་བླུན་པོའི་རྟགས།

 

དྲོད་ཆུང་ཁ་ཡིས་དགྲ་བོ་འདུལ།

རྒྱང་ནས་མཐོང་ན་ཅ་ཅོ་འབྱིན།

འཐབ་སར་ཕྲད་ན་ཐལ་མོ་སྦྱོར།

རང་ཁྱིམ་སླེབས་ན་ང་རྒྱལ་སྨྲ།

 

སྡར་མ་གྲོས་བྱེད་ཚེ་ན་དཔའ།

ཁྲལ་དགོས་པ་ན་ནོར་རྩིས་འདེབས།

འགྲོ་དགོས་པ་ན་ནད་བུ་ལྡང༌།

འཐབ་སར་རྒྱང་ནས་འབོད་ཅིང་བསྒོ།

བློ་ཆུང་ཅུང་ཟད་རྒྱལ་བས་ངོམས།

གལ་ཏེ་ཕམ་ན་གཉེན་ལ་འཁང༌།

གྲོས་ལ་འཚོགས་ན་འཐབ་རྩོད་སློང༌།

གསང་གྲོས་བྱས་ན་ལྐོག་ཏུ་སྨྲ།

 

གཡུལ་ངོར་རྒྱན་ལ་བྱི་དོར་བྱེད།

དགྲ་དང་ཕྲད་ན་རང་ཕྱོགས་སྦེད།

འགྲོགས་ན་དགྲ་བས་གཉེན་ཕྱོགས་འཇིགས།

མཚོན་ཆ་དགྲ་ཡི་ལག་ཆར་འཕེན།

 

དཔུང་ཚོགས་འགྲོ་ན་མཇུག་སྡུད་ལ།

ལྗོག་ན་དེ་ཡི་སྣ་འདྲེན་བྱེད།

བཟའ་བཏུང་མཐོང་ན་ནན་གྱིས་འཇུག

དཀའ་བ་མཐོང་ན་ཐབས་ཀྱིས་འབྱོལ།

 

སྐྱེ་བོ་ངན་པའི་མཚན་ཉིད་ལ།

བརྗོད་རྒྱུ་དུ་མ་ཡོད་མོད་ཀྱང༌།

ངན་སྐྱུགས་ཁྲོན་པ་སུ་ཞིག་སློང༌།

སྐྱུགས་པ་མཁས་པ་སུ་ཞིག་མྱོང༌།

 

མཆུ་བསྐྱོད་པ་ཡིས་བརྡ་སྤྲོད་ཅིང༌།

སྨོས་པའི་ཚེ་ན་མིག་ཚུམས་བྱེད།

རྣམ་ཐར་ཐོས་ན་འཁུན་འཆོར་བ།

གང་ལ་བྱུང་ཡང་ཐ་ཤལ་རྟགས།

 

ལེགས་པར་བཤད་པ་རིན་པོ་ཆེའི་གཏེར་ལས་བླུན་པོ་བརྟག་པ་སྟེ་རབ་ཏུ་བྱེད་པ་གསུམ་པའོ།


上一篇:ལེགས་པར་བཤད་པ་རིན་པོ་ཆེའི་གཏེར་ལས་ཡ་རབས་བརྟག་པ་རབ་ཏུ་བྱེད་པ་གཉིས་པ།

下一篇:ལེགས་པར་བཤད་པ་རིན་པོ་ཆེའི་གཏེར་ལས་སྤེལ་མ་བརྟག་པ་སྟེ་རབ་ཏུ་བྱེད་པ་བཞི་བ།

版权所有:西藏民族大学图书馆 更新

地址:陕西省咸阳市文汇东路六号 邮编:712082 电话:029-33755418 邮箱:lib@xzmu.edu.cn

您是第 2490116 位访客