ལེགས་པར་བཤད་པ་རིན་པོ་ཆེའི་གཏེར་ལས་ཡ་རབས་བརྟག་པ་རབ་ཏུ་བྱེད་པ་གཉིས་པ།

发布时间:2018-05-18 10:53:41

རྟག་ཏུ་དམ་པའི་ཡོན་ཏན་རྣམས།

སྐྱེ་བོ་དམ་པས་ལྷག་པར་སྒྲོགས།

མ་ལ་ཡ་ཡི་ཙན་དན་དྲི།

རླུང་གིས་ཕྱོགས་བཅུར་རྒྱས་པར་བྱེད།

 

དམ་པ་དཔོན་དུ་བསྐོས་གྱུར་ན།

དོན་གྲུབ་པ་དང་བདེ་སྐྱིད་འཐོབ།

ནོར་བུ་རྒྱལ་མཚན་རྩེར་མཆོད་ན།

ཡུལ་ཕྱོགས་དགེ་ཞེས་མཁས་རྣམས་སྒྲོགས།

 

རྒྱལ་ངན་གཞན་གྱིས་གཙེས་པ་ན།

ལྷག་པར་ཆོས་རྒྱལ་དྲན་པར་འགྱུར།

རིམས་ཀྱིས་བཏབ་པའི་སེམས་ཅན་རྣམས།

གངས་ཆུ་འབའ་ཞིག་ཡིད་ལ་བྱེད།

 

སྡིག་སྤྱོད་རྒྱལ་པོས་གཙེས་པ་ལ།

མི་དབང་ཆོས་རྒྱལ་ལྷག་པར་སྐྱོང༌།

འབྱུང་པོའི་གདོན་གྱིས་བཏབ་པ་ལ།

གསང་སྔགས་གྲུབ་པས་རྗེས་སུ་འཛིན།

 

དམ་པ་སྡིག་པ་ཆུང་ཡང་སྤོང༌།

དམན་རྣམས་ཆེན་པོའང་དེ་ལྟ་མིན།

ཞོ་ལ་རྡུལ་ཕྲན་འབྱར་བ་སེལ།

ཆང་ལ་ཕབ་ཀྱང་ལྷག་པར་འདེབས།

སྐྱེ་བོ་དམ་པ་རྒུད་གྱུར་ཀྱང༌།

སྤྱོད་པའི་ཁྱད་པར་ལྷག་པར་མཛེས།

མེ་ནི་ཐུར་དུ་ཁ་བསྟན་ཀྱང༌།

མེ་ལྕེ་གྱེན་དུ་འབར་བ་མཐོང༌།

 

དམ་པ་རྒྱང་ན་གནས་ན་ཡང༌།

འཁོར་འདབས་ཕན་པས་རིང་ནས་སྐྱོང༌།

མཁའ་ལ་སྤྲིན་ཆེན་འཁྲིགས་པ་ཡིས།

ས་ཡི་ལོ་ཏོག་ཁྱད་པར་འཕེལ།

 

གསོན་ཚེ་སྙན་གྲགས་དགའ་བའི་རྒྱུ།

འཇིག་རྟེན་གཞན་དུ་བསོད་ནམས་དགའ།

དེ་གཉིས་མེད་པའི་ནོར་ཙམ་གྱིས།

མཁས་རྣམས་དགའ་བ་བསྐྱེད་མི་ནུས།

 

ཕྱི་རྗེས་རིང་དུ་ལྟ་བ་དང༌།

བག་ཡོད་པ་ལ་བཟོད་སྲན་ཆེ།

བརྩོན་འགྲུས་ཆེ་ཞིང་བརྟན་ལ་གྲིམས།

བྲན་གཡོག་ཡིན་ཡང་དཔོན་དུ་འགྱུར།

 

སྦྱིན་ལ་རྟག་ཏུ་སེམས་སྤྲོ་བ།

དེ་ཡི་གྲགས་པ་རླུང་བཞིན་ལྡང༌།

ཕོངས་པ་སློང་བ་འདུ་བ་བཞིན།

འབྱལ་བར་འདོད་རྣམས་དེ་བས་མང༌།

བྱིན་ནས་སླར་ཡང་མི་ལེན་ལ།

དམན་པའི་བརྙས་པ་དང་དུ་ལེན།

ཕན་པ་ཆུང་ངུའང་མི་བརྗེད་པ།

བདག་ཉིད་ཆེན་པོའི་ཆེ་རྟགས་ཡིན།

 

དམ་པའི་ཡོན་ཏན་སྦས་གྱུར་ཀྱང༌།

འཇིག་རྟེན་ཀུན་ལ་ཁྱབ་པར་གསལ།

སྣ་མའི་མེ་ཏོག་ལེགས་བཀབ་ཀྱང༌།

དྲི་ཞིམ་ཀུན་ཏུ་ཁྱབ་པར་འགྱུར།

 

རྒྱལ་པོ་རང་ཡུལ་ཆེ་བ་ཙམ།

དམ་པ་གང་དུ་ཕྱིན་སར་བཀུར།

མེ་ཏོག་ཕལ་ཆེར་ཉིན་རེའི་རྒྱན།

གཙུག་གི་ནོར་བུ་གང་དུའང་མཆོད།

 

ལྗོན་ཤིང་དུད་པ་འབྲས་བུ་མང༌།

རྨ་བྱ་དལ་བ་མཇུག་སྒྲོ་བཟང༌།

རྟ་མཆོག་དུལ་བ་འགྲོ་མགྱོགས་ཏེ།

དམ་པ་དུལ་བ་མཁས་པའི་རྟགས།

 

དམ་པ་རྣམས་དང་ཕལ་པ་ལ།

བྱས་པ་མཉམ་ཡང་དྲིན་མི་འདྲ།

ཞིང་ལ་ས་བོན་ཁྱད་མེད་ཀྱང༌།

ལོ་ཏོག་ཁྱད་པར་དཔག་ཏུ་མེད།

བདག་ཉིད་ཆེ་ལ་ཕན་བཏགས་ན།

ཅུང་ཟད་ཙམ་ལའང་འབྲས་བུ་འབྱིན།

སྐྱུ་རུ་ར་གཅིག་བྱིན་པ་ལ།

ཆོས་རྒྱལ་བུ་དང་མཉམ་ལ་ལྟོས།

 

བཟང་པོའི་ཆོ་རིགས་སྤྱོད་པས་བསྲུང༌།

སྤྱོད་པ་ཉམས་ན་རིགས་དོན་མེད།

ཙན་དན་དྲི་བཟང་སྐྱེ་བོ་དགའ།

དེ་བསྲེགས་སོལ་བ་སུ་ཞིག་ལེན།

 

ཆེན་པོ་རེ་ཞིག་རྒུད་གྱུར་ཀྱང༌།

དེ་ལ་གདུང་བ་བསྐྱེད་མི་དགོས།

ཟླ་བ་རེ་ཞིག་གཟས་ཟིན་ཡང༌།

དེ་མ་ཐག་ཏུ་གྲོལ་བར་འགྱུར།

 

ཆེན་པོས་དགྲ་ལ་བྱམས་བྱས་ན།

དགྲ་ཉིད་དེ་ཡི་དབང་དུ་འགྱུར།

མང་པོས་བཀུར་བས་ཀུན་བསྐྱངས་པས།

ཀུན་གྱིས་རྒྱལ་པོར་དབང་བསྐུར་ཏོ།

 

དམ་པ་ཇི་ལྟར་རྒྱུད་གྱུར་ཀྱང༌།

སྡིག་དང་འདྲེས་པའི་ཟས་མི་ཟ།

སེང་གེ་བཀྲེས་ཀྱང་མི་གཙང་བའི།

ངན་སྐྱུགས་ཟ་བར་མི་བྱེད་དོ།

དམ་པ་སྲོག་ལ་བབས་ན་ཡང༌།

རང་བཞིན་བཟང་པོ་ག་ལ་འདོར།

ས་ལེ་སྦྲམ་ནི་བསྲེགས་བཅད་ཀྱང༌།

དེ་ཡི་ཁ་དོག་ཉམས་མི་འགྱུར།

 

སྐྱེས་མཆོག་རྣམས་ལ་དམན་པ་རྣམས།

ཁྲོ་ཡང་ལན་དུ་ག་ལ་ཁྲོ།

ཅེ་སྤྱང་དྲེགས་པས་སྐད་འབྱིན་ཡང༌།

རི་དྭགས་རྒྱལ་པོས་སྙིང་རྗེས་སྐྱོང༌།

 

བདག་ཉིད་ཆེ་ལ་སྐྱེ་བོ་རྣམས།

སྐྱོན་འཚོལ་འགྱུར་གྱི་དམན་ལ་མིན།

འཕན་ཟེལ་རིན་ཆེན་ལ་ལྟ་ཡི།

མགལ་དུམ་ལ་ཤེ་སུ་ཞིག་སྤྱོད།

 

བསྟོད་པས་དགའ་བར་མི་འགྱུར་ལ།

སྨད་པས་མི་དགར་མི་འགྱུར་ཞིང༌།

རང་གི་ཡོན་ཏན་ལེགས་གནས་པ།

སྐྱེ་བོ་དམ་པའི་མཚན་ཉིད་ཡིན།

 

སྡིག་པ་དང་ནི་མཐུ་རྩལ་ལས།

བྱུང་བའི་ལོངས་སྤྱོད་ལོངས་སྤྱོད་མིན།

ཁྱི་དང་བྱི་ལ་འགྲངས་ན་ཡང༌།

ངོ་ཚ་བོར་བའི་རྣམ་ཐར་ཡིན།

 

འཁོར་ལ་ཕུན་སུམ་ཚོགས་གྱུར་ན།

རྗེ་དཔོན་ཉིད་ཀྱི་ཆེ་བ་ཡིན།

རྟ་ལ་རྒྱན་དུ་བྱས་པ་དེ།

བདག་པོ་ཉིད་ལ་མི་མཛེས་སམ།

 

ཇི་ལྟ་ཇི་ལྟར་རྗེ་དཔོན་གྱིས།

འཁོར་ལ་དྲིན་གྱིས་བསྐྱངས་གྱུར་པ།

དེ་ལྟ་དེ་ལྟར་འཁོར་གཡོག་རྣམས།

རྗེ་དཔོན་ཉིད་ཀྱི་བྱ་བ་སྒྲུབ།

 

བདག་ཉིད་ཆེན་པོ་གནས་པའི་སར།

མཁས་པ་གཞན་དག་སུ་ཡིས་བརྩི།

མཁའ་ལ་ཉི་མ་ཤར་བ་ན།

རྒྱུ་སྐར་མང་ཡང་མཐོང་མི་འགྱུར།

 

ལེགས་པར་བཤད་པ་རིན་པོ་ཆེའི་གཏེར་ལས་ཡ་རབས་བརྟག་པ་རབ་ཏུ་བྱེད་པ་གཉིས་པའོ།


上一篇:ལེགས་པར་བཤད་པ་རིན་པོ་ཆེའི་གཏེར་ལས་མཁས་པ་བརྟག་པ་སྟེ་རབ་ཏུ་བྱེད་པ་དང་པོ།

下一篇:ལེགས་པར་བཤད་པ་རིན་པོ་ཆེའི་གཏེར་ལས་བླུན་པོ་བརྟག་པ་སྟེ་རབ་ཏུ་བྱེད་པ་གསུམ་པ།

版权所有:西藏民族大学图书馆 更新

地址:陕西省咸阳市文汇东路六号 邮编:712082 电话:029-33755418 邮箱:lib@xzmu.edu.cn

您是第 2715834 位访客