བཀའ་བསྟན་གྱི་རྣམ་བཞག་སྤྱིར་བསྟན་པ།

发布时间:2017-07-04 10:42:04

       ནང་བ་སངས་རྒྱས་པའི་བསྟན་པ་ལ་ལུང་གི་བསྟན་པ་དང་རྟོགས་པའི་བསྟན་པགཉིས་ཡོད་པའི་ལུང་གི་བསྟན་པ་ནི་ཐར་བའི་ལམ་ཕྱིན་ཅི་མ་ལོག་པར་སྟོན་པའི་རྗོད་བྱེད་ཡང་དག་པ་ཞིག་ལ་ཟེར་ཞིང་དེ་ལ་ཆ་རྐྱེན་གཉིས་ལྡན་པ་ནི་འཆོས་པའི་ཡོན་ཏན་དང་སྐྱོབ་པའི་ཡོན་ཏན་གཉིས་ཡིན་ཏེ། འཆོས་པ་ནི་གདུལ་བྱའི་རྒྱུད་ཀྱི་ཉོན་མོངས་ཏེ་བློ་ངན་པ་བཅོས་ཏེ་བཟང་བོར་བསྒྲུབས་པ་ཡིན་ལ་སྐྱོབ་པ་ནི་དེ་ལྟར་སེམས་པ་བཟང་བོ་སྒྲུབ་པ་ལ་བསྟེན་ནས་གདུལ་བྱ་ངན་འགྲོར་མི་སྐྱེ་བས་དེ་ལ་སྐྱོབ་པའི་ཡོན་ཏན་དང་ལྡན་པའོ། །རྟོགས་པའི་བསྟན་པ་ནི་ལུང་གི་བསྟན་པའི་བརྗོད་བྱ་ཉམས་སུ་བླངས་ནས་ཐོབ་པའི་བསླབ་པ་གསུམ་གྱི་ཡོན་ཏན་ལ་ཟེར།

        ནང་བའི་ལུང་གི་བསྟན་པ་ལ་དབྱེ་ན། བཀའ་དང་བསྟན་བཅོས་གཉིས་ཡོད་དེ་དང་བོ་ནི་སངས་རྒྱས་བཅོམ་ལྡན་འདས་ཀྱི་གསུང་ལ་ཞེ་སའི་སྒོ་ནས་བཀའ་ཞེས་འབོད་ལ་མཁས་པ་རྣམས་ཀྱིས་སངས་རྒྱས་ཀྱི་གསུང་ལ་དགོངས་འགྲེལ་གྱི་བསྟན་བཅོས་བརྩམས་པར་བསྟན་བཅོས་ཟེར་མོད་སྤྱིར་བཀའ་ཡང་བསྟན་བཅོས་ཡིན་པ་དེ་ཤེས་དགོས། དེ་བས་རང་རེའི་བོད་ཀྱི་བཀའ་འགྱུར་བསྟན་འགྱུར་ཞེས་པའི་དོན་ཡང་སངས་རྒྱས་ཀྱི་བཀའ་བོད་དུ་བསྒྱུར་ཏེ་བོད་སྐད་དུ་གྱུར་པ་ལ་བཀའ་འགྱུར་དང༌། མཁས་པས་བརྩམས་པའི་བཀའི་དགོངས་འགྲེལ་གྱི་བསྟན་བཅོས་བོད་སྐད་དུ་བསྒྱུར་ཏེ་གྱུར་པ་ལ་བསྟན་འགྱུརཟེར།

        ནང་བའི་ལུང་གི་བསྟན་པ་ལ་བཤད་པའི་བསྟན་པ་དང༌། ནང་དོན་རིག་པ། ཐུན་མོང་མ་ཡིན་པའི་རིག་གནས། ཆོས་ཞེས་མིང་གི་རྣམ་གྲངས་དུ་མ་ཡོད་དེ་སངས་རྒྱས་ཀྱི་བསྟན་པ་བརྗོད་བྱར་བྱེད་པའི་ལུང་ངམ་ཚིག་ཡིན་པས་ན། ལུང་གི་བསྟན་པ་དང༌། ནང་གི་དོན་ཏེ་སེམས་པ་བཟང་བོར་སྒྲུབ་པ་བརྗོད་བྱར་བྱེད་པས་ན་ནང་དོན་རིག་པ་དང་ནང་བ་ཁོ་ན་མ་གཏོགས་གཞན་ལ་མེད་པས་ན་ཐུན་མོང་མ་ཡིན་པའི་རིག་གནས། བསླབ་པ་གསུམ་རྒྱུད་ལ་སྐྱེས་ན་ངན་སོང་དུ་མི་སྐྱེ་བས་དེ་བརྗོད་བྱར་བྱེད་པས་ན་ཆོས་ཟེར་རོ། །

ས་བཅད་དང་བོ། བཀའི་རྣམ་གཞག

        ནང་བའི་ལུང་གི་ཆོས་ལ་མཐའ་ཡས་པ་ཞིག་ཡོད་མོད་བསྡུས་ན་ཆོས་ཀྱི་འཁོར་ལོ་རིམ་པ་གསུམ་དང༌། ཆོས་ཕུང་བརྒྱད་ཁྲི་བཞི་སྟོང༌། སྡེ་སྣོད་གསུམ། གསུང་རབ་ཡན་ལག་བཅུ་གཉིས་སོགས་ཡོད་པས་གོ་སླ་བའི་ངོ་སྤྲོད་རགས་ཙམ་བྱ་ན།

དང་བོ། ཆོས་ཀྱི་འཁོར་ལོ་རིམ་པ་གསུམ།

        ཆོས་འཁོརབསྐོར་ཞེས་པ་སངས་རྒྱས་ཀྱིས་ཆོས་གསུངས་པའི་དོན་ཏེ། སྟོན་པ་དགུང་ལོ་སོ་ལྔ་བཞེས་པའི་ལོ་དེའི་ས་ག་ཟླ་བའི་ཚེས་བཅོ་ལྔ་ཐུན་ཐ་མའི་དུས་སུ་སངས་རྒྱས་ནས་ཞག་བདུན་ཕྲག་བདུན་གྱི་བར་དུ་ཆོས་མ་གསུངས་པར་ཐུགས་ལས་ཆུང་ངུར་བཞུགས། ཞག་བཞི་བཅུ་ཞེ་དགུ་ནས་ཚངས་པ་ཆེན་པོས་གསོལ་བ་བཏབ་པས་ཆོས་ཀྱི་འཁོར་ལོ་བསྐོར་ཅིང་དེ་ལ་ཆོས་འཁོར་ཞེས་པ་ནི་དཔེར་ན་འཁོར་ལོས་བསྒྱུར་བའི་རྒྱལ་བོའི་འཁོར་ལོ་རིན་པོ་ཆེ་དེ་འཕངས་པས་ན་རིམ་བཞིན་འཁོར་ལོ་ཡུལ་གཞན་ནས་གཞན་དུ་རིམ་གྱིས་འཕོ་བ་དང༌། དེའི་དབང་གིས་མི་མཐུན་པའི་ཕྱོགས་ལས་རྒྱལ་བར་བྱེད་པ་བཞིན་སངས་རྒྱས་ཀྱི་ཆོས་དེ་གདུལ་བྱའི་རྒྱུད་ལ་རིམ་གྱིས་འཕོ་བ་དང་འདོད་ཆགས་ལ་སོགས་པའི་མི་མཐུན་པའི་ཕྱོགས་ལས་རྒྱལ་བར་བྱེད་པས་ན་འཁོར་ལོ་དང་ཆོས་མཚུངས་པའི་ཕྱིར་ཆོས་འཁོར་ཞེས་བྱའོ། །

        སྟོན་པ་རིན་པོ་ཆེའི་ཞལ་བཞུགས་དུས་ཆོས་ཀྱི་འཁོར་ལོ་རིམ་པ་གསུམ་བསྐོར་ཞིང་དེ་དག་ལ་ཡང་མཐུན་མི་མཐུན་ཅི་རིགས་གསུངས་ཡོད་པ་ནི་གདུལ་བྱའི་བློ་དང་ལྟ་བ་མི་མཐུན་པས་བློ་དམན་པ་ཞིག་ལ་དེའི་བློ་དང་འཚམ་པའི་ཆོས་གསུངས། བློ་འབྲིང་ལ་དེར་བསྟུན་པའི་ཆོས་གསུང་བ་ལས་བློ་དམན་པ་ཞིག་ལ་ཆོས་རྒྱ་ཆེན་པོ་གསུངས་ན་དགོས་པ་མེད་པའི་ཁར་ད་དུང་གནོད་བསྐྱལ་བ་བཞིན་ཡིན་ཏེ་དཔེར་ན་སློབ་ཆུང་ཞིག་ལ་དེ་དང་བསྟུན་པའི་སློབ་ཁྲིད་དང༌། དེ་བཞིན་སློབ་འབྲིང་ལ་དེའི་བློ་ཁ་དང་བསྟུན་པའི་སློབ་ཁྲིད་བྱ་དགོས་ལ་སྔ་མ་སྔ་མ་རགས་ཤིང་རིམ་བཞིན་ཇེ་ཞིབ་ཏུ་བཏང་ནས་སློབ་གྲྭ་ཆེན་མོའི་སློབ་ཁྲིད་བྱ་དགོས་པ་བཞིན་ནོ། །

1.འཁོར་ལོ་དང་བོ་བདེན་བཞིའི་ཆོས་འཁོར་ཞེས་པ་ནི་སངས་རྒྱས་ནས་དུས་དང་བོར་གསུངས་པས་ན་འཁོར་ལོ་དང་བོ་དང་བདེན་བཞི་བརྗོད་བྱར་བྱེད་པས་ན་བདེན་བཞིའི་ཆོས་འཁོར་ཟེར། བདེན་པ་བཞི་ཐོག་མར་གསུངས་པ་ནི་དེ་བཞི་རྟོགས་སླ་བ་ཙམ་མ་ཡིན་པར་ནང་བའི་བསྟན་པའི་གཞུང་གི་རྨང་གཞི་ཡིན་པའི་རྐྱེན་གྱིས་ཡིན། བདེན་པ་བཞི་ནི་སྡུག་བསྔལ་བདེན་པ་དང༌། ཀུན་འབྱུང་བདེན་པ། འགོག་བདེན། ལམ་བདེན། བཅས་ཏེ་ཚིག་རྒྱས་པར་བཤད་ན་སྡུག་བསྔལ་འཕགས་པའི་བདེན་པ་སྟེ་འཕགས་པས་གསུང་བའི་བདེན་པ་ཞེས་པའི་དོན་ཡིན། སྡུག་བདེན་ལ་ནང་གི་སྡུག་བདེན་དང་ཕྱིའི་སྡུག་བདེན་གཉིས་ཡོད་ལ། ནང་གི་སྡུག་བདེན་ནི་ཟག་བཅས་ཉེར་ལེན་གྱི་ཕུང་བོ་སྟེ་འགྲོ་བའི་ལུས་ཕུང་ཡིན་ལ་དེ་ལ་བརྟེན་ནས་ན་རྒ་འཆི་བའི་འཇིགས་པ་དང་སྡུག་བསྔལ་འབྱུང་བ་དང་ཕྱིའི་སྡུག་བདེན་ནི་རི་ར་བ་ཁང་ཁྱིམ་དང་རྒྱུ་ནོར་སོགས་ཡིན་ལ་དེ་དག་ལས་འཕྲོག་རྩོད། རྩོལ་སྒྲུབ་སོགས་འབྱུང་བས་ན་དེ་གཉིས་ལ་ཡིད་འབྱུང་བའི་ཆེད་དུ་འབྲས་བུའི་མིང་གིས་སྡུག་བསྔལ་ཞེས་བཏགས་ཏེ་འཇིག་རྟེན་གྱི་དམག་འཁྲུག་དང་འགྲན་རྩོད། བཙན་གཉོམ། ཧམ་སེམས། ནད་ཡམས་ཀྱི་སྡུག་བསྔལ་མཐའ་དག་རང་གི་ཕུང་བོ་གཅེས་པར་འཛིན་པ་འདི་ལས་ངེས་འབྱུང་མེད་ན་ཅི་ཡང་མི་འོང་ལ་དེ་བས་སྡུག་བསྔལ་སྡུག་བསྔལ་དུ་ཤེས་ན་དེ་ལས་འབྲལ་འདོད་སྐྱེ། འོན་ཀྱང་འབྲལ་འདོད་སྐྱེ་བ་ཙམ་གྱིས་མི་ཆོག་སྟེ་དེ་ལྡོག་ནུས་མི་ནུས་བསམ་བློ་གཏང་དགོས་པས་རྒྱུ་མ་བཟློགས་ན་སླར་ཡང་འབྱུང་བས།  དཔེར་ན་ཆམ་པའི་རྒྱུ་རྐྱེན་མ་བཅོས་པར་ན་ཟུག་ཙམ་བཅོས་རུང་དགོས་པ་མེད་པ་བཞིན་ནོ། །དེས་ན་སྡུག་བདེན་གྱི་རྒྱུ་གང་ཡིན་ཞེ་ན། ལས་དང་ཉོན་མོངས་གཉིས་ཏེ་དེ་ལ་ཀུན་འབྱུང་བདེན་པ་ཟེར། ལས་ཞེས་པ་ནི་དཔེར་ན་སྲོག་གཅོད་འདོད་ཀྱི་སེམས་པ་དང༌། རྐུ་བྱེད་འདོད་ཀྱི་སེམས་པ་སྟེ་དགེ་མི་དགེ་སྣ་ཚོགས་བྱེད་འདོད་ཀྱི་སེམས་པ་དེ་ཡིན་ལ་ཉོན་མོངས་འདོད་ཆགས་ཞེ་སྡང་གཏི་མུག་ལ་སོགས་ཡིན་ཏེ། དེ་དག་ལས་  འཇིག་རྟེན་གྱི་བྱ་བ་ངན་པ་སྣ་ཚོགས་བྱེད་པས་སོ། །དཔེ་གསལ་བོར་བཤད་ན་འདོད་ཆགས་ཀྱི་དབངགིས་རྐུ་འདོད་ཀྱི་སེམས་པ་སྐྱེ་སྟེ་དེ་བརྐུས་པ་ལ་བརྟེན་ནས་བཙོན་དུ་འགྲིམ་པ་དང༌། ཐ་ན་སྲོག་གཅོད་པ་སོགས་ཀྱི་སྡུག་བསྔལ་འབྱུང་བ་དེ་མཐར་གཏུག་ན་རང་ལུས་སྐྱིད་འདོད་ལ་ཐུག་ཡོད་དེ་སྡུག་བསྔལ་དེའི་འབྱུང་རྩ་ནི་རང་གི་ལུས་ཕུང་ཡིན་པས་སོ། །

        འོན་ཀྱང་ནད་ཀྱི་རྒྱུ་ལྟ་བུའི་ཀུན་འབྱུང་ངོས་ཟིན་ཏེ་བཟློག་ཐུབ་མིན་མ་ཤེས་ན་དེ་ཤེས་པས་དགོས་པ་ཅི་ཡང་མེད་པ་བཞིན་དེ་བཟློག་ཐུབ་མིན་ལ་བསམ་བློ་བཏང་ ནས་དེ་བཀག་པ་སྟེ་རང་གི་རྒྱུད་ནས་མེད་པར་བྱས་པའི་ཆ་ཞིག་ཡོད་པ་ལ་འགོག་བདེན་ཟེར། དེ་འགོག་ཐུབ་པ་ཤེས་རུང་འགོག་བྱེད་ཐབས་མ་ཤེས་ན་ནད་དང་ནད་ཀྱི་རྒྱུ་དེ་དྲག་ཐུབ་པ་ཤེས་ནའང་དྲག་བྱེད་ཀྱི་ཐབས་མ་ཤེས་ན་དགོས་པ་ཅི་ཡང་མེད་པ་བཞིན་ཀུན་འབྱུང་བདེན་པ་འགོག་བྱེད་ནི་ལམ་བདེན་ཡིན་པས་འདི་ནི་ཐེག་པ་ཆེ་ཆུང་གི་ལམ་གྱི་གཞི་རྩ་ཡིན་ལ་མདོ་སྔགས་གཉིས་ཀྱི་གཞི་རྩའང་ཡིན་པས་བདེན་བཞི་ཤེས་པ་ནི་ནང་བའི་བསྟན་པའི་རྨང་གཞི་ཡིན་ནོ། །

        དེ་ལྟ་བུའི་བདེན་བཞིའི་ཆོས་འཁོར་གསུང་བའི་གནས་རྒྱ་གར་གྱི་ཡུལ་ཝ་ར་ན་སིར་དྲང་སྲོང་ལྷུང་བ་རི་དྭགས་ཀྱི་ནགས་སུ་འཁོར་ལྔ་སྡེ་སྟེ་ཀུན་ཤེས་ཀོའུ་དཱུ་ནྱ། རྟ་ཐུལ། རླངས་པ། མིང་ཆེན། བཟང་ལྡན་ལྔ་ལ་འདི་ནི་སྡུག་བསྔལ་འཕགས་པའི་བདེན་པའོ། །ཞེས་ཀུན་འབྱུང་སོགས་བདེན་པ་བཞིའི་ངོ་བོ་ལ་བཟླས་པ་དང་སྡུག་བསྔལ་ཡོངས་སུ་ཤེས་པར་བྱ་བ་སོགས་བདེན་པ་བཞིའི་བྱ་བ་ལ་བཟླས་པ། སྡུག་བསྔལ་ཡོངས་སུ་ཤེས་སོ་ཞེས་མཐར་ཐུག་ལ་བཟླས་པ་སྟེ་བཟླས་པ་གསུམ་དང༌། དེ་ལྟར་བདེན་པ་རེ་རེ་བཟླས་པ་གསུམ་རེ་སྟེ་རྣམ་པ་བཅུ་གཉིས་ཀྱི་སྒོ་ནས་བསྐོར་ཅིང་དེའི་ཚེ་ལྷ་རྣམས་ཀྱིས་འཛམ་བུའི་གླིང་དུ་ཆོས་ཀྱི་འཁོར་ལོ་སྐོར་བ་མཐོང་ངོ་ཞེས་རབ་ཏུ་དགའ་བའི་ཚིག་ཆེད་དུ་བརྗོད་ཅིང༌། དེ་ལྟར་འཕགས་པའི་བདེན་པ་བཞི་ལན་གསུམ་དུ་བཟླས་པ་ལས་དང་བོའི་སྐབས་སུ་ཀུན་ཤེས་ཀཽ་དཱི་ནཱ་དང་ལྷ་བརྒྱད་ཁྲིས་བདེན་པ་མཐོང༌། གཉིས་པའི་ཚེ་ཀུན་ཤེས་ཀཽ་དི་ན་ཡས་དགྲ་བཅོམ་ཐོབ། ལྷག་མ་བཞིས་བདེན་པ་མཐོང༌། བཟླས་པ་གསུམ་པའི་ཚེ་རྟ་ཐུལ་སོགས་བཞིས་ཀྱང་དགྲ་བཅོམ་ཐོབ་པར་གསུངས།

2.འཁོར་ལོ་བར་བ་མཚན་ཉིད་ངོ་བོ་ཉིད་མེད་པ་ཞེས་པ་ནི་དུས་བར་བ་སྟེ་འཁོར་ལོ་དང་བོའི་རྗེས་སུ་གསུངས་པས་འཁོར་ལོ་བར་བ་དང༌། ཆོས་ཐམས་ཅད་བདེན་པར་གྲུབ་པའི་མཚན་ཉིད་ངོ་བོ་མེད་པ་སྟེ་བདེན་པར་མ་གྲུབ་པར་གསུངས་པས་ན་མཚན་ཉིད་ངོ་བོ་ཉིད་མེད་པ་ཟེར། གདུལ་བྱ་བྱང་ཆུབ་སེམས་དཔའ་དབང་རྣོན་ལ་གསུངས་ཏེ་འདིའི་བདེན་མེད་ཅེས་པ་ནི་དཔེར་ན་མི་ཞིག་རྒྱལ་ཁབ་ཀྱི་སྲིད་འཛིན་དུ་བཞག་པའི་ཚེ་ང་ཚོས་བལྟས་ན་ཁོ་སྲིད་འཛིན་དུ་བདེན་པར་གྲུབ་པ་འདྲ་ ལ་དངོས་གནས་བདེན་པར་གྲུབ་ཡོད་ན་ལས་གནས་ལས་བབས་ཚེའང་སྲིད་འཛིན་ཡིན་དགོས་ཏེ་སྲིད་འཛིན་ཁོའི་རང་སྟེང་ན་བདེན་པར་གྲུབ་པས་སོ། །དེ་བཞིན་ཕོར་བ་ཞིག་ཏུ་ཆང་བླུགས་ཚེ་ཆང་ཕོར་ཡིན་མོད་དེ་ཆང་ཕོར་དུ་བདེན་པར་གྲུབ་ན་ཆུ་བླུགས་ཚེའང་ཆང་ཕོར་ཡིན་པ་ལས་ཆུ་ཕོར་མིན། དེ་བས་ཕོར་བ་དེ་ལ་ཆང་ཕོར་ཞེས་བཏགས་པ་ནི་མིང་གིས་བཏགས་པ་ཙམ་ལས་བདེན་པར་མེད་པས་སོ། །དེ་བཞིན་མི་ཞེས་པའང་མིའི་ཕུང་བོ་ལྔའི་ཚོགས་པ་ལ་བཏགས་པ་ཡིན་ལ། མི་ཞེས་པ་གང་ཡིན་ཞེས་བཙལ་ན་ཕུང་བོ་རེ་རེའང་མི་མིན་པས་མི་ཞེས་པ་གང་ཞེ་ན། ཕུང་བོ་ལྔའི་ཚོགས་པ་དེར་མིང་གིས་བཏགས་པ་ལས་བདེན་པར་གྲུབ་མེད་ནའང་ང་རང་ཚོའི་བློའི་འཛིན་ཚུལ་ལ་མི་ཞེས་བདེན་པར་ཡོད་ཡོད་དུ་བཟུང་བས་དེའི་དབང་གིས་རང་ཉིད་གཅེས་འཛིན་གྱི་བསམ་པ་སྐྱེས་ཤིང༌། དེ་ལས་འདོད་ཆགས་ཞེ་སྡང་སོགས་ཉོན་མོངས་སྐྱེས་ཏེ་འཁོར་བར་འཁོར་བ་ཡིན་ནོ། །

        དེའི་ཕྱིར་བདེན་མེད་མ་རྟོགས་ན་འཁོར་བ་ལས་ཐར་མི་ཐུབ་ལ་བློ་ཁ་ཆེར་རྒྱས་པ་ཞིག་གི་བློར་མ་གཏོགས་མི་འཚམ་པས་འཁོར་བྱང་ཆུབ་སེམས་དཔའ་དག་ལ་གསུངས་པ་ཡིན་ཏེ་འཁོར་ལོ་བར་བའི་གསུང་རབ་ནི་ཤེར་ཕྱིན་ཏེ་དེ་ལ་སྐོར་དགུ་རྒྱས་པའི་རྒྱས་པ་ཤེར་ཕྱིན་བམ་པོ་ལྔ་བརྒྱ་དང༌། རྒྱས་པའི་འབྲིང་ཤེར་ཕྱིན་བམ་པོ་བཞི་བརྒྱ་བ། རྒྱས་པའི་བསྡུས་པ་ཤེར་ཕྱིན་འབུམ་པ། འབྲིང་གི་རྒྱས་པ་སྟོང་ཕྲག་ཉི་ཤུ་ལྔ་བ། འབྲིང་གི་འབྲིང་ཁྲི་བརྒྱད་སྟོང་བ། འབྲིང་གི་བསྡུས་པ་ཤེས་རབ་ཁྲི་བ། བསྡུས་པའི་རྒྱས་པ་ཤེར་ཕྱིན་བམ་པོ་བཅོ་བརྒྱད་པ། བསྡུས་པའི་འབྲིང་བརྒྱད་སྟོང་པ། བསྡུས་པའི་བསྡུས་པ་མདོ་སྡུད་པ་རྣམས་སོ། །

3.འཁོར་ལོ་མཐའ་མ་ལེགས་ཕྱེའི་ཆོས་འཁོར་ཞེས་པ་ནི་སྟོན་པས་གནས་ཡངས་པ་ཅན་དང་རི་བོ་མ་ལ་ཡ་སོགས་པར་འཁོར་བྱང་ཆུབ་སེམས་དཔའ་མང་བོ་ལ་གསུངས། དེ་ལ་ལེགས་ཕྱེའི་ཆོས་འཁོར་ཟེར་དོན་ཡང༌། གཞན་དབང་དང་ཡོངས་གྲུབ་གཉིས་བདེན་གྲུབ་དང༌། ཀུན་བཏགས་ཀྱི་ཆོས་ཐམས་ཅད་བདེན་མེད་དུ་ཁྱད་པར་ལེགས་པར་ཕྱེས་ནས་གསུངས་པས་ན་ལེགས་ཕྱེའི་ཆོས་འཁོར་ཟེར། དེ་ཡང་གཞན་དབང་ནི་དངོས་པོ་དེ་རྒྱུ་རྐྱེན་གཞན་གྱི་དབང་གིས་སྐྱེས་པས་ན་གཞན་དབང་ཟེར། དངོས་པོ་དེ་དག་ནང་ཤེས་པ་ལ་མ་བརྟེན་པར་ཕྱི་རོལ་ཏུ་གྲུབ་པ་ལ་ཀུན་བཏགས་ཟེར་ཏེ་དངོས་པོ་དེ་དག་ནང་ཤེས་པའི་བག་ཆགས་ཀྱིས་སྣང་སྟེ་དཔེར་ན་ཉ་ལ་ཆུ་སྐྱིད་པའི་འཇིག་རྟེན་དུ་སྣང་བ་དང༌། དེ་ལས་དབུགས་ཐུམ་ལ་སོགས་པ་མི་འབྱུང་བ་ནི་ཉའི་བག་ཆགས་ཀྱིས་བསྐྱེད་ཅིང་མི་ལ་དེ་ལས་གསོན་མི་ཐུབ་པ་ནི་མིའི་བག་ཆགས་ཀྱིས་བསྐྱེད། དེ་བཞིན་མེ་རིའི་ནང་དུ་གསོན་པའི་འབུར་མེ་ནི་སྐྱིད་པའི་འཇིག་རྟེན་ཏུ་ཁོའི་བག་ཆགས་ཀྱིས་བསྐྱེད་ལ་དེས་སྲེག་པར་བྱེད་པ་ནི་མི་ལ་སོགས་པའི་བག་ཆགས་ཀྱིས་བསྐྱེད་དེ་ནང་ཤེས་པའི་བག་ཆགས་ལ་མ་བརྟེན་པར་ཕྱི་རོལ་ཀྱི་ཆོས་མི་འབྱུང་བ་ནི་འཁོར་ལོ་མཐའ་མའི་བརྗོད་བྱ་སྟེ་དེ་ལ་ཕྱི་དོན་དུ་མ་གྲུབ་ཟེར་བས། དངོས་པོ་རེ་རེ་དེ་ལྟར་མ་གྲུབ་པ་ནི་ཡོངས་གྲུབ་ཟེར། དེ་བས་འཁོར་ལོ་མཐའ་མ་འདིར། གཞན་དབང་ཡོངས་གྲུབ་གཉིས་མངོན་སུམ་གྱིས་བདེན་པར་གྲུབ་ཅིང༌། ཀུན་བཏགས་ཀྱི་ཆོས་རྣམས་རྟོག་པས་སྒྲོ་བཏགས་པ་སྟེ་སྟོན་པས་མཚན་ཉིད་གསུམ་ལ་བདེན་པར་ཡོད་མེད་སོ་སོར་ཕྱེས་ནས་བཤད་པས་ལེགས་ཕྱེའི་ཆོས་འཁོར་ཟེར།

གཉིས་པ། སྡེ་སྣོད་གསུམ།

        སྡེ་སྣོད་ཀྱི་སྐད་དོད་ལ་པི་ཊ་ཀ་ཟེར་ཏེ་དེ་ནི་གང་བུ་དང་བྲེ་བོ་ཆེ་ལ་འཇུག་བྲེ་བོ་ཆེའི་ནང་དུ་བྲེ་ཆུང་མང་བོ་འདུས་པ་བཞིན་འདི་དག་གི་ནང་དུ་བརྗོད་བྱ་བསླབ་པ་མང་བོ་འདུས་པས་ན་སྡེ་སྣོད་ཟེར་ཏེ། སྡེ་ཞེས་པ་ནི་ཚོགས་སུ་གྱུར་པ་སྟེ་མང་བོ་ཞིག་འདུས་པ་ཡིན་ཞིང་དེ་ལྟ་བུའི་སྣོད་ཡིན་པས་སྡེ་སྣོད་ཟེར། ནང་བའི་ལུང་གི་ཆོས་ཏེ་གསུང་རབ་ཐམས་ཅད་སྡེ་སྣོད་གསུམ་དུ་འདུས། དེའི་བརྗོད་བྱ་ནི་ལྷག་པའི་བསླབ་པ་གསུམ་སྟེ། སྤྱིར་བསླབ་པ་གསུམ་ནི་ཚུལ་ཁྲིམས། ཏིང་ངེ་འཛིན། ཤེས་རབ་གསུམ་ཡིན། དེ་དག་བསླབ་བྱའི་ཡུལ་ཡིན་པས་བསླབ་པ་ཟེར། འདི་ཕྱི་ནང་ཀུན་ལ་ཡོད་པས་དམིགས་ཀྱིས་ལྷག་པའི་བསླབ་པ་གསུམ་ཞེས་བརྗོད་དུས། ཕྱི་རོལ་པ་ལས་ལྷག་པ་སྟེ་སྐྱབས་འགྲོས་ཟིན་པའི་བསླབ་པ་ཡིན་པས་སྡེ་སྣོད་གསུམ་གྱི་བརྗོད་བྱའང་འདི་གསུམ་ཡིན་ནོ།།

1.མདོ་སྡེའི་སྡེ་སྣོད་ཀྱི་བརྗོད་བྱ་ཏིང་ངེ་འཛིན་ཡིན། ཏིང་ངེ་འཛིན་ཞེས་པ་ནི་རྩེ་གཅིག་པའི་ངང་ཚུལ་ཏེ་དེ་ལྟར་འཛིན་པས་ཏིང་ངེ་འཛིན་ཟེར། སྡེ་སྣོད་འདིས་དངོས་པོ་གཏན་ལ་འབེབས་པས་བྱེད་ལས་ཐར་བ་འཐོབ་པའི་གེགས་ཀྱི་གཙོ་བོ་བདེན་པ་སོགས་ལ་ཐེ་ཚོམ་ཟ་བ་སེལ། བསླབ་པ་གསུམ་གྱི་རང་བཞིན་གཏན་ལ་འབེབས། འདིའི་སྐད་དོད་སུ་ཏྲ་ཞེས་པ་ངེས་ཚིག་བཤད་ན་བཞི་སྟེ་གནས་ཞེས་པས་ཡུལ་དང་གང་ཟག་ལ་སོགས་པ་ཆོས་འབྱུང་བའི་གླེང་གཞི། མཚན་ཉིད་སྨོས་པ་ནི་གཞན་དབང༌། ཡོངས་གྲུབ། ཀུན་བཏགས་པའི་མཚན་ཉིད་དེ། ངོ་བོ་ཉིད་མེད་པ་གསུམ་སྟོན། ཆོས་སྨོས་པ་ནི་ཕུང་ཁམས་སྐྱེ་མཆེད་ལ་སོགས་སྟོན། དོན་སྨོས་པ་ནི་དགོངས་པ་ཟབ་མོ་སྟོན་པ་སྟེ་ཁྱད་ཆོས་བཞི་ལྡན།

2.མངོན་པའི་སྡེ་སྣོད་ཀྱི་བརྗོད་བྱ་གཙོ་བོ་ཤེས་རབ་སྟེ། ཤེས་པ་ཀུན་ལས་མཆོག་ཏུ་གྱུར་པས་ཤེས་རབ་ཟེར་རོ། །འདི་ནི་ཕྱིན་ཅི་ལོག་པའི་ལྟ་བ་ངན་པ་ལ་ཞེན་པའི་གཉེན་པོར་སྟོན་ཏེ། མདོ་སྡེ་རྒྱན་ལས། མངོན་དུའི་ཕྱིར་དང་ཡང་ཡང་དང༌། །ཟིལ་གནོན་རྟོགས་ཕྱིར་མངོན་པའི་ཆོས། །ཞེས་པ་ལྟར་བདེན་བཞིའི་བླང་དོར་མཐའ་དག་བསྟན་པས་མྱ་ངན་ལས་འདས་པ་ལ་མངོན་དུ་ཕྱོགས་པ་དང༌། ཕུང་བོ་ཁམས་དང་སྐྱེ་མཆེད་རྣམས་ཁྱད་ཆོས་སྣ་ཚོགས་ཀྱི་གསལ་བར་ཡང་ཡང་གཏན་ལ་འབེབས་པ་དང་ཕུང་བོ་ཁམས་སྐྱེ་མཆེད་ཀྱི་རང་སྤྱིའི་མཚན་ཉིད་སོགས་ཕྲ་ཞིབ་ཀྱིས་གཏན་ལ་ཕབ་པས་ཕས་ཀྱི་རྒོལ་བ་མངོན་པར་ཟིལ་གྱིས་གནོན་པ། ཚིག་ཉུང་ལ་དོན་རྒྱས་པས་ཆོས་མངོན་པའི་མདོ་དང་ཡེ་ཤེས་ལ་འཇུག་པ་སོགས་ཀྱི་དོན་ཤེས་བྱའི་རང་སྤྱིའི་མཚན་ཉིད་སོགས་བདེ་བླག་ཏུ་རྟོགས་པ་སོགས་ཁྱད་ཆོས་བཞི་ཡོད། མིང་གཞན་ལ་མ་མོའང་ཟེར།

3.འདུལ་བའི་སྡེ་སྣོད་ནི་སྤྱོད་པ་ཕྱིན་ཅི་ལོག་པ་མཐའ་དག་འདུལ་བའི་གཉེན་པོར་བཞག་སྟེ་དེ་ལ་བརྟེན་ནས་བཀག་པའི་བསླབ་པ་ཉམས་སུ་བླངས་པས་ངལ་ཞིང་དུབ་པའི་མཐའ་སེལ་བ་སྟེ། འདུལ་བའི་སྐད་དོད་པི་ན་ཡ་ཟེར་ཞིང་ལུས་ངག་ཡིད་གསུམ་གྱི་ཉེས་སྤྱོད་འདུལ་བར་བྱེད་པས་འདུལ་བ་ཟེར། དེ་ལྟ་བུའི་ངོ་བོ་དང་རྒྱུ་གཉེན་པོ་ལྟུང་བ་མེད་པ་བཞི་བཅས་རྟེན་པའི་འདུལ་བ་ཟེར།

གསུམ་པ། གསུང་རབ་ཡན་ལག་བཅུ་གཉིས།

        གསུང་རབ་ཡན་ལག་བཅུ་གཉིས་ནི་སྟོན་པའི་གསུང་རབ་ལ་རྗོད་བྱེད་ཚིག་གི་ སྒོ་ནས་དབྱེ་སྟངས་ཏེ་དེ་ནི་ཕྱོགས་གླང་གི་བརྒྱད་སྟོང་འགྲེལ་ཆེན་སྙིང་བོ་མཆོག་ལས། མདོ་སྡེ་དབྱངས་བསྙད་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང༌། །རྟོགས་བརྗོད་དེ་ལྟ་བུ་བྱུང་དང༌། །སྐྱེས་རབས་ཤིན་ཏུ་རྒྱས་པ་དང༌། །རྨད་བྱུང་གཏན་ལ་ཕབ་པའི་སྡེ། གསུང་རབ་ཡན་ལག་བཅུ་གཉིས་ཡིན། །ཞེས་གསུངས།

1 མདོ་སྡེ་ནི་ཕན་ཡོན་བཅུ་དང་ལྡན་པར་གཟིགས་ནས་མདོར་བསྡུས་པའམ་རྐྱང་བ་ལྷུག་པར་བརྗོད་པ་ཞིག་ཡིན་ཏེ་ཕན་ཡོན་བཅུ་ནི། (1)རྣམ་པར་གཞག་སླ་བ། (2)བཤད་སླ་བ། (3)གཟུང་སླ་བ། (4)ཆོས་ལ་གུས་པ་སྐྱེ་སླ་བ། (5)ཆོས་ཉིད་ མྱུར་དུ་རྟོགས་པ། (6)སངས་རྒྱས་ལ་ཤེས་ནས་དད་པ། (7)ཆོས་ལ་ཤེས་ནས་དད་པ། (8)དགེ་འདུན་ལ་ཤེས་ནས་དད་པ། (9)མཐོང་བའི་ཆོས་ཏེ་ཚེ་དེ་ལ་བདེ་བ་ མཆོག་ཐོབ་པ། (10)འབེལ་གཏམ་གྱིས་གཏན་ལ་ཕབ་པས་མཁས་པ་རྣམས་མགུ་བ་བཅས་སོ།།

2  དབྱངས་ཀྱིས་བསྙད་པ་ནི་མདོ་སྡེ་དེ་ཉིད་དུ་དབུས་དང་ཐ་མར་ཚིགས་སུ་བཅད་པའི་དབྱངས་ཀྱིས་བསྙད་པའམ། ཡང་ན་དྲང་བའི་དོན་གྱི་མདོ་སྡེ་རྟོགས་པར་བྱེད་པས་དབྱངས་ཀྱིས་བསྙད་པ་ཞིག་གོ།

3 ལུང་དུ་བསྟན་པའི་སྡེ་ནི་ཉན་ཐོས་དང་དགེ་བསྙེན་སོགས་གང་དུ་སྐྱེ་བ་དང་ཡང་ན་དྲང་དོན་མ་ཡིན་པར་རྣམ་པར་ཕྱེ་ནས་དགོངས་པ་ལུང་དུ་སྟོན་པ་ཞིག་ལ་ཟེར།

4 ཚིགས་སུ་བཅད་པའི་སྡེ་ནི་དཔེར་ན་དགེ་སློང་འདི་ནི་སྟོན་པ་སྟེ། །ཉེ་བར་ཞི་ཞིང་ཟག་པ་ཟད། །ཅེས་པ་ལྟ་བུ་ཚིག་རྐང་གཉིས་ཀྱིས་སྐབས་དོན་རྫོགས་པ་ནས་དྲུག་གི་སྐབས་དོན་རྫོགས་པ་སྟེ་ཚིགས་སུ་བཅད་ནས་གསུངས་བ་ཞིག་ལ་བྱ།

5 ཆེད་དུ་བརྗོད་པའི་སྡེ་ནི་གང་ཟག་གི་མིང་དང་རིགས་དངོས་སུ་མ་བརྗོད་པར་ཕྱི་རབས་ཀྱི་གདུལ་བྱ་རྣམས་ཀྱི་ཆེད་དུ་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར། གང་ཟག་ཁ་ཅིག་གིས་ཆོས་འདི་ལྟ་བུར་སྟོན་པར་འགྱུར་རོ་ཞེས་ཆོས་དེ་ལ་ལྷག་པར་བསྔགས་པ་བརྗོད་པ་ཞིག་གོ །

6 གླེང་གཞིའི་སྡེ་ནི་རྫ་མཁན་གྱི་བུ་ནོར་ཅན་ཞེས་པས་སྡོང་བོ་བརྐུས་པ་ལ་བརྟེན་ནས་མ་བྱིན་ལེན་གྱི་བཅས་པ་མཛད་པ་ལྟ་བུ་ཡིན།

7 རྟོགས་པ་བརྗོད་པའི་སྡེ་ནི། རྒྱལ་བོ་ཚངས་བྱིན་གྱིས་སྔོན་བྱུང་བ་སྟོན་པ་ལྟ་བུ་མ་རྟོགས་པའི་དོན་དཔེ་དང་བཅས་གསལ་བར་སྟོན་པ་ཞིག་གོ།

8 དེ་ལྟ་བུ་བྱུང་གི་སྡེ་ནི་མདོ་སྡེ་ལས་བརྒྱ་ལྟ་བུ་སྟེ་འདས་པའི་ཚེ་རབས་གཅིག་ནས་གཅིག་ཏུ་རྒྱུ་བ་ལྟ་བུ་སྟོན་པ་ཞིག་གོ།

9 སྐྱེས་རབས་ཀྱི་སྡེ་ནི་བྱང་ཆུབ་སེམས་དཔའ་རྣམས་ཀྱིས་སེམས་ཅན་གྱི་དོན་དུ་སྐྱེ་བ་གཅིག་ནས་གཅིག་ཏུ་བརྒྱུད་དེ་སྤྱོད་པ་ངོ་མཚར་བ་དུ་མ་མཛད་ཚུལ་སྟོན་པ་ཞིག་གོ།

10 ཤིན་ཏུ་རྒྱས་པའི་སྡེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྒྱས་འབྲིང་བསྡུས་གསུམ་ལྟ་བུ་སྟེ་སེམས་ཅན་ལ་ཕན་བདེ་འབྱུང་བའི་གནས་ཡིན་ཞིང་ཕ་རོལ་ཏུ་ཕྱིན་པ་རྒྱས་པ་སྟོན་པ་རྒྱས་པ་དང༌། མཐུ་རྒྱ་ཆེ་བ་སྟོན་པ་རྒྱ་ཆེ་བ། བདག་མེད་སྟོན་པས་ཟབ་པ་སྟོན་པའི་སྡེ་སྣོད་ཡིན་ནོ། ། ཡང་དེས་སྒྲིབ་པ་མཐའ་དག་འཇོམས་པའི་ཐབས་རྒྱས་པར་སྟོན་པའི་རྣམ་པར་འཐག་པ་དང༌། བརྗོད་བྱའི་ངོས་ནས་ཁྱོད་དང་འདྲ་བའམ་ལྷག་པ་མེད་པས་མཚུངས་བྲལ་ཅེས་ཀྱང་བྱའོ།།

11 རྨད་དུ་བྱུང་བའི་སྡེ་ནི་ཉན་ཐོས་དང་བྱང་སེམས། སངས་རྒྱས་རྣམས་ཀྱི་ངོ་མཚར་རྨད་དུ་བྱུང་བའི་ཆོས་བསྟན་ཚུལ་བཤད་པ་ཞིག་གོ།

12 གཏན་ལ་ཕབ་པར་བསྟན་པའི་སྡེ་ནི་ཆོས་རྣམས་ཀྱི་རང་སྤྱིའི་མཚན་ཉིད་རྒྱས་པར་སྟོན་པ་ཞིག་གོ།

        གསུང་རབ་ཡན་ལག་བཅུ་གཉིས་སྡེ་སྣོད་གསུམ་དུ་འདུ་སྟེ་འདུ་ཚུལ་ལ་ཀུན་བཏུས་ལྟར་ན་དང་བོ་ལྔ་ཉན་ཐོས་ཀྱི་མདོ་སྡེའི་སྡེ་སྣོད་དང་དེ་ནས་གླེང་གཞི་ལ་སོགས་བཞི་ཐེག་པ་ཆེ་ཆུང་གཉིས་ཀའི་འདུལ་བའི་སྡེ་སྣོད། ཤིན་ཏུ་རྒྱས་པ་དང་རྨད་དུ་བྱུང་བའི་སྡེ་གཉིས་ཐེག་ཆེན་གྱི་མདོ་སྡེའི་སྡེ་སྣོད། གཏན་ལ་ཕབ་པའི་སྡེ་ཐེག་པ་ཆེ་ཆུང་གཉིས་ཀའི་མངོན་པའི་སྡེ་སྣོད་ཡིན་གསུངས། ཉན་ས་ལྟར་ན་མདོ་སྡེ་ནས་ཆེད་དུ་བརྗོད་པ་བར་ལྔ་དང་རྟོགས་བརྗོད་ནས་རྨད་བྱུང་བར་བཅུ་མདོ་སྡེའི་སྡེ་སྣོད། གླེང་གཞི་འདུལ་བའི་སྡེ་སྣོད། གཏན་ལ་དབབ་པ་མངོན་པའི་སྡེ་སྣོད་དུ་བཤད་དོ། །

བཞི་བ། བཀའ་ལ་བདག་རྐྱེན་གྱི་དབྱེ་ཚུལ།

        བདག་རྐྱེན་ཏེ་རྒྱུ་བྱེད་ཚུལ་གྱིས་དབྱེ་ན། བཀའ་ལ་ཞལ་ནས་གསུངས་པའི་བཀའ། བྱིན་གྱིས་བརླབས་པའི་བཀའ། རྗེས་སུ་གནང་བའི་བཀའ་སྟེ་གསུམ་ཡོད་དོ།།

1.ཞལ་ནས་གསུངས་པའི་བཀའ་ནི་གསུང་རབ་དེ་མགོ་མཇུག་བར་གསུམ་དུ་སྟོན་པའི་ཞལ་ནས་དངོས་སུ་གསུངས་པ་ཞིག་སྟེ་དཔེར་ན་མདོ་སྡུད་པ་ལྟ་བུ།

2.བྱིན་གྱིས་བརླབས་པའི་བཀའ་ནི་སྟོན་པས་དངོས་སུ་གསུངས་པ་མིན་པར་གཞན་གྱིས་གསུངས་པ་ལ་སྟོན་པས་གཟི་བྱིན་གྱིས་བཀར་བསྒྱུར་པ་ལ་ཟེར། དེ་ལ་གསུམ། སྐུས་བྱིན་གྱིས་བརླབས་པ་ནི་ས་བཅུ་བའི་མདོ་ལྟ་བུ། གསུང་གིས་བྱིན་གྱིས་བརླབས་པ་ནི་མ་སྐྱེས་དགྲའི་འགྱོད་པ་བསལ་བའི་མདོ་ལྟ་བུ། གསུམ་པ་ལ་གསུམ་ལས། ཐུགས་རྗེས་བྱིན་གྱིས་བརླབས་པ་ནི་ཤེས་རབ་སྙིང་བོ་ལྟ་བུ། ཐུགས་ཏིང་ངེ་འཛིན་གྱིས་བྱིན་གྱིས་བརླབས་པ་ནི་ལྷ་ཀླུ་དང་གནོན་སྦྱིན་སོགས་ཀྱིས་རང་རང་གི་སྔགས་སྨྲས་པ་སངས་རྒྱས་ཀྱིས་བྱིན་བརླབས་ལྟ་བུ། ཐུགས་བདེན་པས་བྱིན་གྱིས་བརླབས་པ་ནི་སངས་རྒྱས་ཀྱི་མཐུས། རི་དང༌། ཤིང་དང༌། ནམ་མཁའ། འོད་ཟེར། རོལ་མོ་ལས་ཆོས་ཀྱི་སྒྲ་བྱུང་བ་ལྟ་བུའོ།།

3.རྗེས་སུ་གནང་བའི་བཀའ་ནི་གླེང་གཞི་དང༌། མཚམས་སྦྱོར། རྗེས་སུ་ཡི་རངས་རྣམས་ཏེ་ཆོས་ཡང་དག་པར་སྡུད་པ་ལས། འདི་སྐད་བདག་གིས་ཐོས་པ་ཞེས་གྱིས་ལ་ཆོས་བསྡུ་བར་བྱའོ། །ཞེས་འབྲེལ་དང་གོ་རིམ་དག་ཀྱང་བསྟན་པར་བྱའོ། །ཞེས་རྗེས་ སུ་གནང་བའི་ཕྱིར་རོ།།

ལྔ་བ། གདུལ་བྱའི་སྒོ་ནས་དབྱེ་བ།

        སྟོན་པའི་གསུང་རབ་ཇི་སྙེད་ཅིག་བཞུགས་པ་མཐའ་དག་གདུལ་བྱའི་སླད་དུ་མ་གསུངས་པ་ཤིག་མི་སྲིད། དེ་བས་འདུལ་བྱ་ལ་བློ་ཁ་ཆེ་ཆུང་གི་ཐེག་དམན་དང་ཐེག་ཆེན་གྱི་སྡེ་སྣོད་གཉིས་འབྱུང༌། ཐེག་པ་ཞེས་པ་ནི་ལམ་གྱི་རྟོགས་པའི་མིང༌། རང་དོན་དུ་ཐར་བ་གཙོ་བོར་དོན་དུ་གཉེར་བའི་ཉན་རང་ནི་བློ་རྒྱ་ཆུང་བས་ཐེག་དམན་དང་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་དོན་དུ་གཉེར་བའི་བྱང་ཆུབ་སེམས་དཔའ་ནི་བློ་རྒྱ་ཆེ་བས་ཐེག་ཆེན་ཞེས་བརྗོད་པས། སྔ་མའི་ཆེད་དུ་གསུངས་པའི་འཁོར་ལོ་དང་བོ་ལྟ་བུ་ལ་ཉན་ཐོས་སམ་ཐེག་དམན་གྱི་སྡེ་སྣོད་དང༌། ཕྱི་མའི་ཆེད་དུ་བཀའ་བསྩལ་བའི་སྡེ་སྣོད་འཁོར་ལོ་བར་མཐའ་ལྟ་བུ་ལ་བྱང་ཆུབ་སེམས་ དཔའ་འམ་ཐེག་ཆེན་གྱི་སྡེ་སྣོད་ཟེར།

        ཐེག་ཆེན་གྱི་སྡེ་སྣོད་ལ་དབྱེ་ན། རྒྱུ་ཕ་རོལ་ཏུ་ཕྱིན་པའི་ཐེག་པ་བརྗོད་བྱར་བྱེད་པའི་མདོ་དང་འབྲས་བུ་རྡོ་རྗེའི་ཐེག་པ་བརྗོད་བྱར་བྱེད་པའི་སྔགས་ཞེས་པ་གཉིས་ཡོད་ལ་རྒྱུ་ཕར་ཕྱིན་ཐེག་པ་ནི་སེམས་བསྐྱེད་དང་སྙིང་རྗེ། ཡང་དག་པའི་ལྟ་བ། ཕར་ཕྱིན་དྲུག་སོགས་བྱང་ཆུབ་སེམས་དཔའི་ལམ་སོགས་བཤད་པའི་སྡེ་སྣོད་ཡིན་ལ་དེ་དག་འབྲས་བུ་རྡོ་རྗེའི་ཐེག་པའི་རྒྱུ་ལྟ་བུ་ཡིན། འབྲས་བུ་རྡོ་རྗེའི་ཐེག་པ་ནི་འབྲས་བུའི་གནས་སྐབས་ཀྱི་གནས་ལུས་ལོངས་སྤྱོད། མཛད་པ་སྟེ་ཡོངས་དག་བཞི་དང་རྣམ་པ་མཐུན་པའི་ལམ་ད་ལྟ་ཉིད་ནས་སྒོམ་ཞིང་བགྲོད་པའི་ཕྱིར་སྔགས་ཀྱི་ཐེག་པ་ཟེར། སྣོད་མིན་ལ་གསང་ཞིང་སྦས་དགོས་པས་ན་གསང་སྔགས་དང༌། ཐབས་ཤེས་དབྱེར་མེད་པར་སྦྱོར་བ་རྡོ་རྗེའི་སེམས་དཔའི་རྣལ་འབྱོར་ཡིན་པས་རྡོ་རྗེའི་ཐེག་པ་དང༌། ཕ་རོལ་ཏུ་ཕྱིན་པ་ལས་ཐབས་མཁས་པའི་ཁྱད་པར་དུ་འཕགས་པས་ན་ཐབས་ཀྱི་ཐེག་པ་ཟེར། དེ་བརྗོད་བྱར་བྱེད་པའི་བསྟན་བཅོས་ལ་རྒྱུད་སྡེ་དང་རིག་འཛིན་གྱི་སྡེ་སྣོད་ཅེས་བྱ་སྟེ་བརྗོད་བྱ་མུ་རུ་འབྲེལ་བས་ན་རྒྱུད་དང༌། རིག་སྔགས་རྣམས་ཀྱི་བསླབ་པའི་གཞི་དང་གྲུབ་པའི་མཐའ་སྟོན་པའི་ཕྱིར་རིག་པ་འཛིན་པའི་སྡེ་སྣོད་དོ།།

དྲུག་པ། ཆོས་ཀྱི་ཕུང་བོ་བརྒྱད་ཁྲི་བཞི་སྟོང༌།

        སྟོན་པས་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་གསུངས་པར་བཞེད་ཅིང༌། དེ་ནི་འདོད་ཆགས་ལ་སྤྱོད་པ་ཉི་ཁྲི་ཆིག་སྟོང༌། ཞེ་སྡང་ལ་སྤྱོད་པ་ཉི་ཁྲི་ཆིག་སྟོང༌། གཏི་མུག་ལ་སྤྱོད་པ་ཉི་ཁྲི་ཆིག་སྟོང༌། དུག་གསུམ་ཆ་མཉམ་དུ་སྤྱོད་པ་ཉི་ཁྲི་ཆིག་སྟོང་བཅས་ཉོན་མོངས་བརྒྱད་ཁྲི་བཞི་སྟོང་ཡོད་པ་ལས་དེ་རེ་རེ་སྟེ་སྤྱོད་པ་སྣ་རེའི་གཉེན་པོ་རྫོགས་པར་སྟོན་པའི་གཞུང་གི་ཚོགས་ལ་ཆོས་ཀྱི་ཕུང་བོ་ཞེས་བྱ་སྟེ་མཛོད་ལས། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་བོ་མཐུན་པར་གསུངས། །ཞེས་གསུངས། འོ་ན་ཆོས་ཀྱི་ཕུང་བོ་དེ་མང་བོ་ཞིག་ཡོད་ན་ཅིའི་ཕྱིར་འཛམ་གླིང་དུ་མི་སྣང་ཞེ་ན་ལྷ་དང་ཀླུ་ཡི་འཇིག་རྟེན་སོགས་འཇིག་རྟེན་ཁམས་གཞན་དང་གཞན་ན་ཡོད་པར་བཞེད་དོ།།

ས་བཅད་གཉིས་པ། བསྟན་བཅོས་ཀྱི་རྣམ་གཞག

        བསྟན་བཅོས་ཞེས་པ་ནི་གདུལ་བྱའི་རྒྱུད་ཀྱི་ཉོན་མོངས་དུག་གསུམ་སྤངས་ཏེ་བསླབ་པ་གསུམ་ལྡན་དུ་འཆོས་པ་དང༌། འབྲས་བུ་ངན་འགྲོ་དང་སྲིད་པའི་སྡུག་བསྔལ་ལས་སྐྱོབ་པ་སྟེ་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པས་བསྟན་བཅོས་ཏེ་རྒྱུད་བླ་མ་ལས། ཉོན་མོངས་དགྲ་རྣམས་མ་ལུས་འཆོས་པ་དང༌། །ངན་འགྲོའི་སྲིད་ལས་སྐྱོབ་པ་གང་ཡིན་པ། །འཆོས་སྐྱོབ་གཉིས་ལྡན་ཕྱིར་ན་བསྟན་བཅོས་ཏེ། །གཉིས་ པོ་འདི་དག་གཞན་གྱི་ལུགས་ལ་མེད། །ཅེས་གསུངས་པ་ལྟར་རོ། །དེས་ན་རྒྱལ་བའི་བཀའ་ཡང་བསྟན་བཅོསཡིན་མོད་འདིར་ནི་བཀའ་དང་བསྟན་བཅོས་གཉིས་སུ་ཕྱེས་པའི་བསྟན་བཅོས་དེ་སངས་རྒྱས་མ་ཡིན་པས་བརྩམས་པའི་བསྟན་བཅོས་འཆད་པར་བྱའོ།།

དང་བོ། བསྟན་བཅོས་ལ་མཆོག་དམན་གྱིས་དབྱེ་བ།

        སྤྱིར་བསྟན་བཅོས་ལ་སྒྲས་བརྗོད་ཀྱིས་དབྱེ་ན། དགུ་སྟེ་དབྱིག་གཉེན་གྱི་རྣམ་བཤད་རིག་པ་ལས། དོན་མེད་དོན་ལོག་དོན་དང་ལྡན། །ཐོས་རྩོད་སྒྲུབ་པ་ལྷུར་ལེན་པ། །ངན་གཡོ་བརྩེ་བྲལ་སྡུག་བསྔལ་སྤོང༌། །བསྟན་བཅོས་དྲུག་བྲལ་གསུམ་དུ་འདོད། །ཅེས་གསུངས་པ་ལྟར་དགུ་ཡོད་པའི་ནང་བསྟན་བཅོས་ལྟར་སྣང་དྲུག་དང་ཡང་དག་གསུམ་ཡོད།།

1.དོན་མེད་པའི་བསྟན་བཅོས་ནི་བྱ་རོག་སོ་རྟོག་གི་བསྟན་བཅོས་ལྟ་བུ་བྱ་རོག་ ལ་སོ་ཡོད་མེད་དཔྱད་པས་དགོས་པ་ཅི་ཡང་མེད་པས་སོ།།

2.དོན་ལོག་པའི་བསྟན་བཅོས་ནི་སྐྱེ་བ་སྔ་ཕྱི་མེད་པར་སྟོན་པའི་བསྟན་བཅོས་ཏེ་དེ་ཡིས་དོན་མ་ཡིན་པ་བཤད་པས་སོ།།

3.དོན་དང་ལྡན་པའི་བསྟན་བཅོས་ནི། རྩ་བ་ཤེས་རབ་ལྟ་བུ་སྟེ་དེ་ལས་སྟོང་ཉིད་རིགས་པ་མཐའ་ཡས་པས་བཤད་པས་སོ།།

4.ཐོས་པ་ལྷུར་ལེན་པའི་བསྟན་བཅོས་ནི། ཕྱི་རོལ་པའི་རིག་བྱེད་ཀྱི་བསྟན་བཅོས་ལྟ་བུ་སྟེ་ཐོས་པ་གཙོ་བོར་འཛིན་པས་ཉམས་ལེན་སོགས་ཅི་ཡང་མེད་པས་སོ།།

5.རྩོད་པ་ལྷུར་ལེན་གྱི་བསྟན་བཅོས་ནི། ཕྱི་རོལ་པའི་ཚད་མའི་བསྟན་བཅོས་ལྟ་བུ་སྟེ་རྩོད་པ་གཙོ་བོར་བཤད་པས་སོ།།

6.སྒྲུབ་བ་ལྷུར་ལེན་གྱི་བསྟན་བཅོས་ནི། མངོན་རྟོགས་རྒྱན་ལྟ་བུ་སྟེ་དེ་ལས་ཐམས་ཅད་མཁྱེན་པ་སྒྲུབ་པའི་ཐབས་གཙོ་བོར་སྟོན་པས་སོ།།

7.ངན་གཡོའི་བསྟན་བཅོས་ནི། མཚོན་ཆ་དང་དུག་སྦྱོར་ལ་སོགས་འགྲོ་བ་མི་ལ་གནོད་པའི་ཐབས་སོགས་སྟོན་པའི་བསྟན་བཅོས་ལྟ་བུ་ཡིན།

8.བརྩེ་བ་བྲལ་བའི་བསྟན་བཅོས་ནི། ཕྱི་རོལ་པའི་མཐོ་རིས་ཀྱི་ཆེད་དུ་ཕྱུགས་གསོད་པ་ལ་སོགས་མཆོད་སྦྱིན་བྱེད་པའི་བསྟན་བཅོས་ལྟ་བུ།

9.སྡུག་བསྔལ་སྤོང་བའི་བསྟན་བཅོས་ནི། སྤྱོད་འཇུག་ལྟ་བུ་སྟེ་འགྲོ་བའི་སྡུག་བསྔལ་འཇོམས་པའི་ཐབས་འབའ་ཞིག་སྟོན་པས་སོ།།བསྟན་བཅོས་དགུ་བོ་དེ་ལས་དོན་དང་ལྡན་པའི་བསྟན་བཅོས་དང་སྒྲུབ་པ་ལྷུར་ལེན་པའི་བསྟན་བཅོས། སྡུག་བསྔལ་སྤོང་བའི་བསྟན་བཅོས་གསུམ་བསྟན་བཅོས་རྣམ་དག་ཡིན་ལ་གཞན་དྲུག་ནི་བསྟན་བཅོས་ལྟར་སྣང་ཡིན་ནོ།།

གཉིས་པ། བྱེད་ལས་ཀྱི་སྒོ་ནས་དབྱེ་བ།

བསྟན་བཅོས་ལ་བྱེད་ལས་ཀྱི་སྒོ་ནས་དབྱེ་ན། གསུམ་སྟེ་རྒྱ་ཆེན་པོ་སྡུད་པའི་བསྟན་བཅོས་དང༌། ཟབ་མོ་རྣམ་པར་འབྱེད་པའི་བསྟན་བཅོས། འཁྲུགས་པ་གོ་རིམ་དུ་བསྡེབས་པའི་བསྟན་བཅོས་གསུམ་ཡོད།

1.རྒྱ་ཆེན་པོ་སྡུད་པའི་བསྟན་བཅོས་ནི་འདུལ་བ་མདོ་རྩ་བ་ལྟ་བུ་སྟེ་དེས་འདུལ་བ་ལུང་སྡེ་བཞི་སོགས་ཀྱི་དོན་རྒྱ་ཆེན་པོ་བསྡུས་པས་སོ།།

2.ཟབ་མོ་འབྱེད་པའི་བསྟན་བཅོས་ནི་མངོན་རྟོགས་རྒྱན་དང་རྩ་ཤེ་ལྟ་བུ་སྟེ་སྔ་མས་སྦས་དོན་མངོན་རྟོགས་ཀྱི་རིམ་པ་འབྱེད་པ་དང་ཕྱི་མས་དངོས་བསྟན་སྟོང་ཉིད་ཀྱི་རིམ་པ་བཀྲལ་བས་སོ།།

3.འཁྲུགས་པ་གོ་རིམ་དུ་བསྡེབས་པའི་བསྟན་བཅོས་ནི་མདོ་སྡེ་རྒྱན་དང་བསླབ་བཏུས་ལྟ་བུ་ཡིན་ཏེ་དེ་མདོ་མང་བོ་ཕྱོགས་གཅིག་ཏུ་བསྡུས་ཏེ་གོ་རིམ་བསྒྲིགས་པས་སོ། །དང་བོ། འདི་ལ་ཤེས་བྱ་ཇི་སྙེད་པ་སྟོན་པ་དང༌། ཇི་ལྟ་བ་སྟོན་པ། ཐར་བ་དང་ཐམས་ཅད་མཁྱེན་པ་སྟོན་པའི་བསྟན་བཅོས་གསུམ། ཤེས་བྱ་ཇི་སྙེད་སྟོན་པའི་བསྟན་བཅོས་ཕལ་བ་དང་ཁྱད་པར་ཅན་གཉིས་ལས་དང་བོ་ནི་ཤེས་རབ་བརྒྱ་བ་དང༌། ཤེས་རབ་སྡོང་བུ། སྐྱེ་བོ་གསོ་ཐིགས་སོགས་ཡ་རབས་མི་ཆོས་ཀྱི་བསྟན་བཅོས་ཏེ་འཇིག་རྟེན་པའི་ལུགས་ཀྱི་བསྟན་བཅོས་དག་ཡིན། ཁྱད་པར་ཅན་ནི་རིག་གནས་ཆེ་བ་ལྔ་ལྟ་བུ་སྟེ་དེ་དག་གིས་སྟོང་ཉིད་མ་ཡིན་པའི་ཆོས་ཏེ་ཇི་སྙེད་སྟོན་པས་སོ། །ཇི་ལྟ་བ་སྟོན་པ་ནི་དབུ་མ་རྒྱན་ལྟ་བུ་སྟེ། ཇི་ལྟ་བ་སྟེ་སྟོང་ཉིད་སྟོན་པས་སོ། །ཐར་བ་དང་ཐམས་ཅད་ མཁྱེན་པའི་ལམ་སྟོན་པ་ནི་བྱང་ས་ལྟ་བུའོ།།

གསུམ་པ། བཀའི་དགོངས་པ་འགྲེལ་ཚུལ་གྱིས་དབྱེ་བ།

        བསྟན་བཅོས་ལ་བཀའི་དགོངས་པ་འགྲེལ་ཚུལ་གྱིས་བཀའ་སྤྱིའི་དགོངས་པ་འགྲེལ་བ་དང་སོ་སོའི་དགོངས་པ་འགྲེལ་བའི་བསྟན་བཅོས་གཉིས་ཡོད།

        དང་བོ་ནི་ཚད་མ་ཀུན་བཏུས་ལྟ་བུ་སྟེ་དེས་གསུང་རབ་སྤྱིའི་དགོངས་པ་འགྲེལ་བར་བྱེད་པས་སོ། །གཉིས་པ་ལ་གསུམ་ལས་འཁོར་ལོ་དང་བོའི་ལྟ་བའི་ཆ་གསལ་བར་བྱེད་པ་མངོན་པ་མཛོད་ལྟ་བུ། སྤྱོད་པའི་ཆ་གསལ་བར་བྱེད་པ་འདུལ་བ་མདོ་རྩ་ལྟ་བུའོ། །ལྟ་སྤྱོད་ཟུང་འབྲེལ་དུ་གཏན་ལ་འབེབ་པ་བྱེ་བྲག་བཤད་མཛོད་ལྟ་བུ། འཁོར་ལོ་བར་བའི་དགོངས་འགྲེལ་ལྟ་བའི་ཆ་གསལ་བར་བྱེད་པ་དབུ་མ་རིགས་ཚོགས་དྲུག་ལྟ་བུ། སྤྱོད་པའི་ཆ་གསལ་བར་བྱེད་པ་སྤྱོད་འཇུག་ཆེན་མོ་ལྟ་བུ། ལྟ་སྤྱོད་ཟུང་འབྲེལ་དུ་སྟོན་པ་མངོན་རྟོགས་རྒྱན་ལྟ་བུ། འཁོར་ལོ་མཐའ་མའི་དགོངས་འགྲེལ་ལ་ལྟ་བའི་ཆ་གསལ་བར་བྱེད་པ་ཐེག་པ་ཀུན་ལས་བཏུས་པ་ལྟ་བུའོ། །སྤྱོད་པའི་ཆ་གསལ་བར་ བྱེད་པ་སྡོམ་པ་ཉི་ཤུ་བ་ལྟ་བུ། ལྟ་སྤྱོད་གཉིས་ཀ་ཟུང་འབྲེལ་དུ་སྟོན་པ་མདོ་སྡེ་རྒྱན་ལྟ་བུ།

བཞི་བ། བསྟན་བཅོས་རིགས་བསྡུས་ཀྱིས་དབྱེ་བ།

        བསྟན་བཅོས་ཀྱི་རིགས་བསྡུ་ན་བཀའ་ལ་བརྟེན་པ་དང་མི་བརྟེན་པ་གཉིས་ཡོད་ཅིང་བརྟེན་པ་ལའང་བཀའ་ཉིད་ལ་འགྲེལ་བ་དང་བཀའི་དོན་རང་རྒྱུད་དུ་བརྩམས་པ་གཉིས། བཀའི་འགྲེལ་བ་ལ་ཚིག་དོན་གཉིས་ཀ་རྒྱ་ཆེར་འགྲེལ་བ་སོ་སོར་ཐར་བའི་འགྲེལ་བ་བམ་པོ་ལྔ་བཅུ་པ་ལྟ་བུ་རྒྱ་ཆེར་འགྲེལ། ཚིག་གི་ཆ་སྤྲོས་པ་དང་བཅས་ནས་འཆད་པ་ཆེད་དུ་བརྗོད་པའི་ཚོམས་ཀྱི་འགྲེལ་བ་ལྟ་བུ་ཚིག་གི་འགྲེལ་བ། གོ་དཀའ་བའི་དོན་རྣམ་པར་འབྱེད་པ་སྡུད་འགྲེལ་གཉིས་ལྟ་བུའི་དཀའ་འགྲེལ། དོན་གྱི་གཙོ་ བོ་བསྡུས་ནས་སྟོན་པ་སྡུད་པའི་དོན་བསྡུས་དང་དྲི་མེད་འོད་ཀྱིས་འགྲེལ་བའི་སྡུད་པའི་དོན་བསྡུས་ལྟ་བུ་དོན་འགྲེལ། ངག་གི་དོན་དྲིལ་ནས་སྟོན་པ་ངག་དོན་གྱི་འགྲེལ་བ་སྟེ་ལྔའོ།།

        བཀའི་དོན་རང་རྒྱུད་དུ་བརྩམས་པའང་བཀའ་གཅིག་གི་དོན་རྫོགས་པར་སྟོན་པ་མངོན་རྟོགས་རྒྱན་དང་མདོ་རྩ་ལྟ་བུ། ཐོར་བུར་སྟོན་པ་དགེ་ཚུལ་གྱི་ཀཱ་རི་ཀ་ལྟ་བུའོ། །བཀའ་མང་བོའི་དོན་སྟོན་པ་བསླབ་བཏུས་དང་བཤེས་སྤྲིངས་ལྟ་བུ་གསུམ་ཡོད།

ལྔ་བ། གཞུང་བཀའ་པོད་ལྔ།

        གཞུང་བཀའ་པོད་ལྔ་ནི་ནང་བའི་གྲུབ་མཐའ་བཞིའི་གཞུང་ལུགས་ཁ་ཚང་ལ་སློབ་གཉེར་བྱེད་པའི་གཞུང་ལུགས་ཏེ་ཚད་མ་དང༌། ཕར་ཕྱིན། དབུ་མ། མཛོད། འདུལ་བ་བཅས་ཡིན། འདིར་དེ་དག་ངོ་སྤྲོད་རགས་ཙམ་བྱ་སྟེ།

1.ཚད་མ་ནི་སྟོན་པ་སངས་རྒྱས་ཀྱིས་ཚད་མའི་གཞུང་དངོས་སུ་གསུངས་མེད་མོད་ཁོང་གི་གསུང་རབ་ཏུ་ཚད་མའི་སྐོར་མང་བོ་ཞིག་འབྱུང་བ་ནི་ནང་བའི་ཚད་མའི་ཁུངས་ཡིན། ཚད་མ་ནི་གསར་དུ་རྟོགས་པའི་བློ་མི་བསླུ་བ་ཞིག་ལ་ཟེར་ལ་དེ་བརྗོད་བྱར་བྱེད་པའི་བསྟན་བཅོས་ལ་ཚད་མ་རིག་པ་ཟེར། ནང་བའི་ཚད་མའི་བསྟན་བཅོས་ཀྱི་ཐོག་མ་དགྲ་བཅོམ་པ་ཆོས་སྐྱོབ་ཀྱིས་བརྩམས་པའི་སྨྲ་བའི་སྒྲོན་མེ་ ཡིན། དེ་ནས་སློབ་དཔོན་ཕྱོགས་ཀྱི་གླང་བོས་ཚད་མ་ཀུན་བཏུས་ཏེ་ཚད་མ་མདོ་ལེའུ་དྲུག་ཅན་བརྩམས། དེ་འགྲེལ་བ་ལ་སློབ་དཔོན་ཆོས་གྲགས་ཀྱིས་ཚད་མ་སྡེ་བདུན་བརྩམས་ཤིང་དགོངས་པ་མཐར་ཐུག་པ་ནི་སེམས་ཙམ་པའི་ལུགས་ཡིན། རིགས་པའི་གནད་མང་བོ་ཕྱེས་པ་ལ་བརྟེན་ནས་ཚད་མ་རིག་པ་དར་ཁྱབ་བྱུང༌། རྗེས་སུ་དེ་དག་བོད་དུ་བསྒྱུར་ཏེ་འཆད་ཉན་བསྐྱངས་པས་དར་ཁྱབ་ཆེན་པོ་བྱུང་ལ་ཚད་མའི་རྩ་བ་ནི་རྣམ་འགྲེལ་ལ་བྱེད་ཅིང་དེ་ལ་བོད་ཀྱི་འགྲེལ་བ་དང་མཐའ་དཔྱོད་ཤིན་ཏུ་མང་ངོ༌། །

2.ཕར་ཕྱིན་ནི་སྟོན་པའི་འཁོར་ལོ་བར་བའི་སྦས་དོན་གྱི་ཆ་ཐམས་ཅད་རྗེ་བཙུན་བྱམས་པས་གསལ་བར་ཕྱེས་ཏེ་གཏན་ལ་ཕབ། དེའི་གཞུང་ནི་བྱམས་ཆོས་སྡེ་ལྔ་ལས་མངོན་རྟོགས་རྒྱན་ཡིན། འདིས་གཙོ་བོ་རྣལ་འབྱོར་སྤྱོད་པའི་ལུགས་ལྟར་བཤད། ཕར་ཕྱིན་ཞེས་པ་ཕ་རོལ་ཏུ་ཕྱིན་པ་ཞེས་པའི་ཚིག་སྡུད་དེ། ཕ་རོལ་ནི་འཁོར་བ་ཕྲ་རགས་རྒྱ་མཚོའི་ཕ་རོལ་སྟེ་དེ་ལ་ཕྱིན་བྱེད་དང་ཕྱིན་ཟིན་གཉིས་ལས། བྱང་ཆུབ་སེམས་དཔའི་ལམ་ཐམས་ཅད་ཕ་རོལ་ཕྱིན་བྱེད་དེ་ལམ་ཤེར་ཕྱིན་དང་སངས་རྒྱས་ཀྱི་མཁྱེན་པ་ནི་ཕ་རོལ་ཕྱིན་ཟིན་འབྲས་བུ་ཤེར་ཕྱིན་དེ་གཉིས་བརྗོད་བྱར་བྱེད་པའི་བསྟན་བཅོས་ལ་གཞུང་ཤེར་ཕྱིན་ཟེར། གཞུང་བཀའ་པོད་ལྔའི་ཕར་ཕྱིན་ནི་གཞུང་ཤེར་ཕྱིན་ཡིན།

        དེའི་བརྗོད་བྱ་ནི་དངོས་པོ་བརྒྱད་དང་དོན་བདུན་ཅུ་སྟེ་ཤེར་མདོའི་སྦས་དོན་གྱི་ཆ་དག་ཡིན། དེ་ལ་འགྲེལ་བ་མང་ནའང་ཐུན་མོང་གི་སྦྱང་བྱའི་གཞུང་དུ་བྱེད་པ་ནི་སློབ་དཔོན་སེང་གེ་བཟང་བོའི་འགྲེལ་བ་དོན་གསལ་ཡིན་ལ་བོད་དུ་རྗེ་བླ་མའི་ལེགས་བཤད་གསེར་འཕྲེང་དང་རྒྱལ་ཚབ་ཀྱི་རྣམ་བཤད་སྙིང་བོའི་རྒྱན་གྲགས་ཆེ་ལ་མཐའ་དཔྱོད་དང་སྤྱི་དོན་སྣ་ཚོགས་བགྲང་ལས་འདས།

3.དབུ་མ་ནི་ཤེར་མདོའི་དངོས་བསྟན་སྟོང་ཉིད་ཀྱི་ཆ་སློབ་དཔོན་ཀླུ་སྒྲུབ་གྱིས་དབུ་མ་རིགས་ཚོགས་དྲུག་གིས་རྒྱས་པར་བཀྲལ་བ་ལ་བརྟེན་ནས་སངས་རྒྱས་བསྐྱངས་ཀྱིས་ཐལ་འགྱུར་བའི་ལུགས་སུ་བཀྲལ། དཔལ་ལྡན་ཟླ་བས་དབུ་མ་འཇུག་པ་མཛད་དེ། ཐལ་འགྱུར་བའི་སྲོལ་རྒྱས་པར་བྱས། བསྟན་བཅོས་དེ་ནི་དབུ་མའི་རྩ་བ་རེད།

        དབུ་མ་ལ་སྒྲས་བརྗོད་ཀྱིས་དབྱེ་ན། ཆོས་ཐམས་ཅད་གཞི་དབུ་མ་དང༌། དེ་རྟོགས་པའི་ལམ་ཤེར་ཕྱིན་ལམ་དབུ་མ། ཉམས་སུ་བླངས་པའི་འབྲས་བུ་དབུ་མ་ཟེར། དེ་བརྗོད་བྱར་བྱེད་པའི་བསྟན་བཅོས་ལ་གཞུང་དབུ་མ་ཟེར། དེ་ལ་འགྲེལ་བ་རྗེ་བླ་མའི་རྣམ་བཤད་དགོངས་པ་རབ་གསལ་གྲགས་ཆེ་ལ་དེ་གཞིར་བཟུང་བའི་མཐའ་དཔྱོད་དང་སྤྱི་དོན་ཤིན་ཏུ་མང༌།

4.མངོན་པ་ནི་སྟོན་པ་སངས་རྒྱས་ཀྱིས་གསུངས་པའི་གཞུང་གཅིག་མེད་ནའང་ཐོར་བུར་གསུངས་པ་དག་ཕྱོགས་གཅིག་ཏུ་བསྡུས་ནས་མངོན་པ་སྡེ་བདུན་དང་བྱེ་བྲག་བཤད་མཛོད་ཆེན་མོ་བརྩམས། རྗེས་སུ་དབྱིག་གཉེན་གྱིས་དེ་དག་ལས་གཅེས་གཅེས་རྣམས་བཏུས་ཏེ་མངོན་པ་མཛོད་བརྩམས་པ་ནི་མངོན་པའི་རྩ་བར་བྱེད། འདི་ནི་འཁོར་ལོ་དང་བོའི་ལྟ་བའི་ཆ་འགྲེལ་བ་ཡིན་ལ་གྲུབ་མཐའི་གཞུང་ནི་བྱེ་བྲག་སྨྲ་བ་ལྟར་ཡིན། རྒྱ་བོད་ཀྱི་འགྲེལ་བ་མང་ན་ཡང་གྲགས་ཆེ་བ་ནི་མཆིམས་འཇམ་པའི་དབྱངས་ཀྱིས་བརྩམས་པའི་མཛོད་འགྲེལ་མངོན་པའི་རྒྱན་ཡིན།

5.འདུལ་བ་ནི་གདུལ་བྱའི་ལུས་ངག་ཡིད་གསུམ་གྱི་སྤྱོད་པ་མ་རུང་བ་འདུལ་བྱེད་ཀྱི་སོ་སོར་ཐར་བའི་སྡོམ་པ་བཤད་པའི་གཞུང་སྟེ་འཁོར་ལོ་དང་བོའི་སྤྱོད་པའི་ཆ་གསལ་བར་བྱེད་པ་ཡིན་ལ་གཞུང་དོན་བྱེ་བྲག་སྨྲ་བ་ལྟར་འཆད་པ་ཡིན། སྟོན་པའི་གསུང་ལུང་སྡེ་བཞི་སོགས་འདུལ་བའི་གཞུང་ཤིན་ཏུ་མང་ལ་དེ་དག་སྡོམ་པའི་ཚུལ་དུ་སློབ་དཔོན་ཡོན་ཏན་འོད་ཀྱིས་འདུལ་བ་མདོ་རྩ་མཛད་པ་ནི་འདུལ་བའི་རྩ་བར་བྱེད། དེ་ལ་གཞི་སྟོད་དང་གཞི་སྨད་གཉིས་ཡོད་ཅིང༌། བརྗོད་བྱ་སྡོམ་པ་མ་ཐོབ་པ་འཐོབ་པར་བྱེད་པ་དང་ཐོབ་པ་མི་ཉམས་པ། ཉམས་པ་ཕྱིར་འཆོས་པའི་ཐབས་སྟོན་ནོ། །དེ་ལ་འགྲེལ་བ་མང་མོད་གྲགས་ཆེ་བ་ནི་ཀུན་མཁྱེན་མཚོ་སྣ་བས་མཛད་པའི་འདུལ་ཊཱིཀ་ཉི་མའི་འོད་ཟེར་ཡིན།

ས་བཅད་གསུམ་པ། བཀའ་བསྟན་ལ་འཇུག་ཚུལ།

        སྟོན་པས་ཆོས་གསུངས་པ་ཐམས་ཅད་གདུལ་བྱའི་ཁམས་དང༌། མོས་པ། བག་ལ་ཉལ་ཇི་ལྟ་བུ་སྟེ་གདུལ་བྱའི་བློ་ཁ་དང་བསྟུན་ནས་གསུངས། གདུལ་བྱའི་བློ་ཁ་མཐོ་དམན་མི་འདྲ་བས་བཀའི་ཚིག་ཟིན་ལའང་འདྲ་མིན་སྣ་ཚོགས་ཡོད། དཔེར་ན། སྟོན་པས། ཕ་དང་མ་ནི་གསད་བྱ་ཞིང༌། །བྲམ་ཟེ་གཙང་སྦྲ་ཅན་གཉིས་དང༌། །ཡུལ་འཁོར་འཁོར་དང་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་གསུངས་པ་ལྟ་བུ་སྟེ་དེ་དགོངས་པ་གཞན་དུ་དྲངས་ཏེ་ཕ་ནི་སྲེད་པ་དང་མ་ནི་སྲིད་པར་བྱ་དགོས་པ་ལས་ཕ་མ་དངོས་གནས་པ་གསད་བྱ་ཡིན་ཞེ་ན་ཐ་ཤལ་གྱི་ཚིག་ཏུ་འགྲོ་བ་ལྟར་རོ། །དེ་བས་བཀའ་ལ་འཇུག་དུས། དྲང་དོན་དང་ངེས་དོན་དུ་ཕྱེ་དགོས་ལ། དགོངས་ལྡེམ་དགོངས་དང༌། རིགས་པ་བཞི་དང་རྟོན་པ་བཞི་སོགས་ཤེས་པ་གལ་ཆེ་བས་འདིར་ཆེད་དུ་ངོ་སྤྲོད་མདོར་བསྡུས་ཙམ་བྱའོ། །

དང་བོ། དྲང་དོན་དང་ངེས་དོན།

        དྲང་དོན་གྱི་མདོ་ཞེས་པ་སྟོན་པས་གདུལ་བྱ་ཁ་དྲང་བའི་ཕྱིར་གསུངས་པ་ལ་དོན་ངོ་མ་ཚིག་ཟིན་ཇི་ལྟ་བུར་མི་རུང་བ་ཞིག་ཡིན་ཏེ་དཔེར་ན་དགེ་སློང་དག ཕུང་བོ་ལྔ་ནི་ཁུར་རོ། །ཁུར་འཁུར་བ་ནི་གང་ཟག་གོ་ལྟ་བུ་སྟེ་དེའི་ཚིག་ཟིན་ལ་རང་སྐྱ་ཐུབ་པའི་བདག་ཡོད་པར་བསྟན་ལ་དེ་ནི་རང་སྐྱ་ཐུབ་པའི་བདག་ཡོད་པར་འདོད་པ་ཤུགས་ཆེ་བ་དག་རྗེས་སུ་གཟུང་བའི་ཕྱིར་རེ་ཞིག་བསྟན་པ་ཡིན་ཏེ་དེ་ལྟར་མ་བསྟན་པར་བདག་མེད་བསྟན་ན་སྣོད་དུ་མི་རུང་བས་སོ། །ངེས་དོན་ནི་ཚིག་ཟིན་ཇི་ལྟ་བུར་ དོན་ཡང་དེར་ངེས་པ་ཞིག་ཡིན་ཏེ་དཔེར་ན་སྒྲ་མི་རྟག་པར་སྟོན་པའི་མདོ་ལྟ་བུའོ། །

གཉིས་པ། དགོངས་ལྡེམ་དགོངས།

        དགོངས་ལྡེམ་དགོངས་ནི་དགོངས་པ་ཅན་གྱི་མདོ་དང་ལྡེམ་དགོངས་ཀྱི་མདོ་ཞེས་པའི་དོན་ཡིན། དགོངས་གཞི་གཙོ་བོར་ཡོད་ཅིང་དགོས་དབང་གིས་སྒྲས་ཟིན་སྒྲ་ཇི་བཞིན་པ་མ་ཡིན་པར་སྟོན་པའི་མདོ་དེ་དགོངས་པ་ཅན་གྱི་མདོ་ཡིན་ལ་དེ་ལ་དབྱེ་ན། མཉམ་པ་ཉིད་ལ་དགོངས་པ། དོན་གཞན་ལ་དགོངས་པ། དུས་གཞན་ལ་དགོངས་པ། གང་ཟག་གི་བསམ་པ་ལ་དགོངས་པ་སྟེ་རྣམ་པ་བཞི་ཡོད།

1 མཉམ་པ་ཉིད་ལ་དགོངས་པ་ནི་དཔེར་ན་སྟོན་པས། ང་ཉིད་དེ་ཚེ་ཡང་དག་པར་རྫོགས་པའི་སངས་རྒྱས་རྣམ་གཟིགས་སུ་གྱུར་ཏོ།།ཞེས་པ་ལྟ་བུ་སྟེ་སངས་རྒྱས་ཐམས་ཅད་ཀྱི་ཆོས་སྐུ་མཉམ་པ་ཉིད་ལ་དགོངས་ནས་དེ་ལྟར་གསུངས་པ་ལས་དོན་དངོས་སུ་སངས་རྒྱས་རྣམ་གཟིགས་སུ་གྱུར་པར་སྟོན་པ་མ་ཡིན་ནོ།།

2 དོན་གཞན་ལ་དགོངས་པ་ནི་ལས་ཉོན་གཉིས་སྤང་བྱ་ཡིན་པར་དགོངས་ནས། ཕ་དང་མ་ནི་གསད་བྱ་ཞིང་ཞེས་གསུངས་པ་ལྟ་བུ།

3 དུས་གཞན་ལ་དགོངས་པ་ནི་ལེ་ལོ་ཅན་གྱི་ངོར་གང་དག་བདེ་བ་ཅན་དུ་སྐྱེ་བའི་སྨོན་ལམ་འདེབས་པ་དེ་དག་ཏུ་སྐྱེ་བར་འགྱུར་རོ། །ཞེས་པ་ལྟ་བུ་སྟེ། ཤི་འཕོས་མ་ཐག་ཏུ་བདེ་བ་ཅན་དུ་སྐྱེ་བའི་ངེས་པ་མེད་ཀྱང་དུས་གཞན་དུ་སྐྱེའོ་སྙམ་དུ་དགོངས་པའོ།།

4 གང་ཟག་གི་བསམ་པ་ལ་དགོངས་པ་ནི་སྦྱིན་པ་ཙམ་གྱིས་ཆོག་པར་འཛིན་པའི་གང་ཟག་གི་ངོར་སྦྱིན་པ་ལ་སྨད་ནས་ཚུལ་ཁྲིམས་ལ་བསྔགས་པ་བརྗོད་པ་ལྟ་བུ་སྟེ་དེ་ནི་གདུལ་བྱའི་བསམ་ངོ་ལ་བལྟས་ནས་དགོས་པའི་སླད་དུ་བྱས་པའོ།།

ལྡེམ་པོར་དགོངས་པ་ལའང་བཞི་སྟེ། གཞུག་པ་ལྡེམ་དགོངས། མཚན་ཉིད་ལྡེམ་དགོངས། གཉེན་པོ་ལྡེམ་དགོངས། བསྒྱུར་བ་ལྡེམ་དགོངས་བཞི་སྟེ་དགོངས་པ་གཙོ་བོ་སྒྲ་ཇི་བཞིན་དུ་ཁས་བླང་མི་རུང་བའི་མདོ་སྟེ། ལྡེམ་པོ་ནི་འཁྱོག་པའི་བརྡ་སྟེ་གདུལ་བྱ་རྗེས་སུ་གཟུང་བའི་སླད་དུ་འཁྱོག་པོར་གསུངས་པ་ལ་ཟེར།

གཙོ་ངོས།ཤོག་ངོས་གོང་མ།123ཤོག་ངོས་འོག་མ།ཤོག་ངོས་མཐའ་མ།

 

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག

1.གཞུག་པ་ལྡེམ་དགོངས་ནི་བདེན་པར་མེད་པར་བསྟན་ན་སྐྲག་པའི་གང་ཟག་ཉན་ཐོས་ལ་སོགས་པ་བསྟན་པ་ལ་གཞུག་པའི་དོན་དུ་གཟུགས་སོགས་བདེན་པར་ཡོད་པར་བསྟན་པ་ལྟ་བུའོ།།

2.མཚན་ཉིད་ལྡེམ་དགོངས་ནི་སེམས་ཙམ་པའི་ལུགས་ལ་མཚན་ཉིད་གསུམ་རང་རང་གི་ངོ་བོ་མེད་ཚུལ་ལ་དགོངས་ནས་ངོ་བོ་མེད་ཅེས་བསྟན་པ་ལྟ་བུ།

3.གཉེན་པོ་ལྡེམ་དགོངས་ནི་དཔེར་ན་མདོ་སྡེ་རྒྱན་ལས། སངས་རྒྱས་ཆོས་ལ་བརྙས་པ་དང༌། །ལེ་ལོ་ཅུང་ཟད་ཆོག་འཛིན་དང༌། །ང་རྒྱལ་འདོད་ཆགས་སྤྱོད་པ་དང༌། །འགྱོད་དང་མ་ངེས་ལྡོག་པ་དང༌། །སེམས་ཅན་རྣམས་ཀྱི་སྒྲིབ་པ་སྟེ། །དེ་ཡི་གཉེན་པོར་ཐེག་མཆོག་གསུངས། །ཅེས་གསུངས་པ་ལྟར་ཉེས་པ་བརྒྱད་གདུལ་བའི་ཕྱིར་དུ་བསྟན་པ་ལྟ་བུ་སྟེ། སངས་རྒྱས་ལ་བརྙས་པའི་གཉེན་པོར་དགོངས་པ་དང་བོ་བཤད་པ་དང༌། རྟོགས་པའི་ཆོས་ལ་བརྙས་པའི་གཉེན་པོར་གང་གཱའི་ཀླུང་གི་བྱེ་མ་སྙེད་དང་མཉམ་པའི་སངས་རྒྱས་ལ་བསྙེན་བཀུར་བྱས་ན་ད་གཟོད་ཐེག་ཆེན་གྱི་རྟོགས་པ་སྐྱེའོ་ལྟ་བུ། ལེ་ལོའི་གཉེན་པོར་དུས་གཞན་ལ་དགོངས་པ་ལྟ་བུ། ཅུང་ཟད་ཙམ་གྱིས་ཆོག་པར་འཛིན་པའི་གཉེན་པོར་ལ་ལར་སྦྱིན་སོགས་ལ་སྨད་ནས་གཞན་དུ་བསྔགས་པ་ལྟ་བུ། འདོད་ཆགས་ལ་སྤྱོད་པའི་གཉེན་པོར་སངས་རྒྱས་ཞིང་གི་འབྱོར་བར་བསྔགས་པ་ལྟ་བུ། ང་རྒྱལ་ལ་སྤྱོད་པའི་གཉེན་པོར་སངས་རྒྱས་ལ་ལའི་ཕུན་ཚོགས་བསྔགས་པ་ལྟ་བུ། འགྱོད་པའི་གཉེན་པོར་གང་དག་སངས་རྒྱས་དང་བྱང་སེམས་ལ་གནོད་པར་བྱེད་པ་དེ་དག་མཐོ་རིས་སུ་འགྲོའོ། །ཞེས་པ་ལྟ་བུ། སེམས་ཙམ་པའི་ལུགས་ལ་མ་ངེས་པ་ལྡོག་པའི་གཉེན་པོར་ཉན་ཐོས་རྣམས་ལུང་བསྟན་པ་དང༌། ཐེག་པ་གཅིག་ཏུ་བཤད་པ་ལྟ་བུའོ། །འདི་དང་ལྡེམ་དགོངས་གཉིས་པ་སེམས་ཙམ་པ་ཁོ་ནའི་འདོད་པའོ།།

4.བསྒྱུར་བ་ལྡེམ་དགོངས་ནི་རབ་ཏུ་གྲགས་པའི་ཡི་གེ་ངན་པ་གྲགས་པའི་དོན་བསླབ་པ་གསུམ་སྟོན་བྱེད་དུ་བསྒྱུར་བ་སྟེ་དཔེར་ན་སྙིང་བོ་མེད་ལ་སྙིང་བོར་ཤེས། ། ཕྱིན་ཅི་ལོག་ལ་ལེགས་པར་གནས། །ཉོན་མོངས་པས་ནི་རབ་ཉོན་མོངས། །བྱང་ཆུབ་དམ་པ་འཐོབ་པར་འགྱུར། །ཞེས་པ་ལྟ་བུ་སྟེ་དེ་ལ་སྙིང་བོ་ནི་སེམས་ཀྱི་རྣམ་གཡེང་དང༌། དེ་མེད་པ་ནི་སྙིང་བོ་མེད་པའོ། །ཕྱིན་ཅི་ལོག་ནི་གཙང་བདེ་རྟག་བདག་ལས་ལོག་པའོ། །ཉོན་མོངས་པ་ནི་ཡུན་རིང་བོར་དཀའ་སྤྱོད་ཀྱིས་ངལ་བར་བྱས་པ་སོགས་ཀྱི་མིང་གིས་བསྟན་པའི་ཚུལ་ཁྲིམས་ཉམས་སུ་བླངས་ན་བྱང་ཆུབ་དམ་པ་ཐོབ་པར་ གསུངས་པ་ལྟ་བུའོ།།

གསུམ་པ། རྟོན་བཞི།

        འདིའི་རྟོན་མི་རྟོན་ནི་ཁས་ལེན་མི་ལེན་དང༌། རྗེས་སུ་འབྲང་རིགས་མི་རིགས། བསླུ་མི་བསླུ་དང༌། བདེན་མི་བདེན་ལ་བྱེད། དེ་ལ་བཞི་ཡོད་དེ་གང་ཟག་ལ་མི་རྟོན་ཆོས་ལ་རྟོན་པ། ཚིག་ལ་མི་རྟོན་དོན་ལ་རྟོན་པ། དྲང་དོན་ལ་མི་རྟོན་ངེས་དོན་ལ་རྟོན་པ། རྣམ་ཤེས་ལ་མི་རྟོན་ཡེ་ཤེས་ལ་རྟོན་པ་བཞིའོ།།

1 གང་ཟག་དེ་བཟང་བ་ཙམ་རྒྱུ་མཚན་དུ་མི་བྱེད་པར་ཚིག་དང་དོན་ལ་བརྟགས་ནས་ཁས་ལེན་པ་དེ་སྐྱེས་བུ་ཁྱད་པར་ཅན་ལ་ལྟོས་པའི་གང་ཟག་ལ་མི་རྟོན་ཆོས་ལ་རྟོན་པའི་དོན་དང༌། ཡང་ན་གདུལ་བྱ་རྣམས་ཀྱི་བསམ་པ་ལྟར་ཐར་བ་འཐོབ་པའི་ཐབས་སུ་མི་བདེན་པའམ། ཁས་མི་ལེན་པའམ། མི་བསླུ་བ་མ་ཡིན་པ་དང༌། རྒྱལ་བས་སྡེ་སྣོད་ཇི་སྙེད་ཅིག་བཀའ་བསྩལ་བ་རྣམས་ཐར་བ་ཐོབ་པའི་ཐབས་སུ་བདེན་པའམ། ཁས་ལེན་པའམ། མི་བསླུ་བ་ནི་སྐྱེ་བོ་ཕལ་བ་ལ་ལྟོས་ཏེ་གང་ཟག་ལ་མི་རྟོན་ཆོས་ལ་རྟོན་པའི་དོན།

2 རྒྱལ་བའི་བཀའ་བསྟན་དག་ཚིག་ཟིན་ལྟར་གནས་ལུགས་སོགས་ལ་མི་བསླུ་བའི་ངེས་པ་མེད་པར་བསམ་དོན་གྱི་བརྗོད་བྱ་དེ་དང་དེ་ལ་སྒྲུབ་བྱེད་རྣམ་དག་ཡོད་པ་ལྟར་ཁས་ལེན་པ་དེ་ཚིག་ལ་མི་རྟོན་པར་དོན་ལ་རྟོན་པའི་དོན་ཡིན།

3 འདི་ལ་གཉིས་ཏེ་དྲང་དོན་ཀུན་རྫོབ་བདེན་པ་སྟོན་པའི་མདོའི་བཤད་ཚུལ་ལྟར་གནས་ལུགས་སུ་མི་བདེན་པར་ངེས་དོན་སྟོང་ཉིད་སྟོན་པའི་མདོའི་བཤད་ཚུལ་ལྟར་གནས་ལུགས་སུ་ཁས་ལེན་པ་ནི་རྗོད་བྱེད་ཀྱི་དབང་དུ་བྱས་པའི་དྲང་དོན་ལ་མི་རྟོན་ངེས་དོན་ལ་རྟོན་པའི་དོན་དང༌། ཀུན་རྫོབ་སྣ་ཚོགས་སུ་སྣང་བ་ལྟར་གནས་ལུགས་སུ་མི་བདེན། སྣང་བ་དེ་ལྟར་བདེན་པས་སྟོང་བ་དེ་གནས་ལུགས་སུ་ཁས་ལེན་པ་ནི་བརྗོད་བྱའི་དབང་དུ་བྱས་པའི་དྲང་དོན་ལ་མི་རྟོན་ངེས་དོན་ལ་རྟོན་པའི་དོན་ཡིན།

4 འདིའི་རྣམ་ཤེས་ལ་སྟོང་ཉིད་རྟོགས་མ་རྟོགས་གཉིས་ཡོད་ཀྱང་ཡེ་ཤེས་ནི་གཙོ་བོ་སྟོང་ཉིད་མངོན་སུམ་དུ་རྟོགས་པའི་ཡེ་ཤེས་ཡིན་ཡང་སྟོང་ཉིད་རྟོགས་པའི་སྒོམ་བྱུང་གི་ཤེས་རབ་རྣམས་ཀྱང་དེར་འཇོག་ཅིང༌། རྣམ་ཤེས་དེ་སྔ་མ་དག་གི་སྣང་ཚུལ་ལྟར། གནས་ལུགས་སུ་ཁས་མི་ལེན་པ་རྣམ་ཤེས་ལ་མི་རྟོན་པའི་དོན་དང་ཡེ་ཤེས་དེ་དག་གཙོ་བོར་སྟོང་ཉིད་མངོན་སུམ་དུ་རྟོགས་པའི་ཡེ་ཤེས་ཀྱིས་གཟིགས་པ་ལྟར་གནས་ལུགས་སུ་ཁས་ལེན་པ་དེ་ཡེ་ཤེས་ལ་རྟོན་པའི་དོན་ཡིན། ཡང་ན། དྲང་དོན་ལ་མི་རྟོན་ངེས་དོན་ལ་རྟོན་ཞེས་པའི་བཤད་ཚུལ་ཆ་གཅིག་ལ་ངེས་དོན་ལ་རྣམ་ཤེས་ཡེ་ཤེས་གཉིས་ཡོད་ཅིང་སྟོང་ཉིད་དོན་སྤྱིའི་ཚུལ་དུ་རྟོགས་པའི་འཇིག་རྟེན་པའི་ཤེས་པའི་སྣང་ཚུལ་ལྟར་དུ་ཁས་མི་ལེན་པར་འཕགས་པའི་མི་རྟོག་ཡེ་ཤེས་ཀྱི་གཟིགས་ཚུལ་ལྟར་གནས་ལུགས་མཐར་ཐུག་ཏུ་ཁས་ལེན་པ་རྣམ་ཤེས་ལ་མི་རྟོན་ཡེ་ཤེས་ལ་རྟོན་པའི་དོན་དུ་བཤད།

བཞི་བ། རིགས་པ་བཞི།

        ཆོས་ཉིད་སོགས་ལ་དཔྱོད་པ་ལ་རིགས་པ་བཞི་ཡོད་དེ། ལྟོས་པའི་རིགས་པ། འཐད་པའི་རིགས་པ། བྱ་བ་བྱེད་པའི་རིགས་པ། ཆོས་ཉིད་ཀྱི་རིགས་པ་བཞི་ཡོད།

1 བྱས་པ་རྒྱུ་རྐྱེན་ལ་ལྟོས་པའམ་ཆོས་ཐམས་ཅད་རང་གི་ཆ་ཤས་སོགས་ལ་ལྟོས་པའི་རིགས་པ།

2 ཁ་དོག་དཀར་དམར་དང་ཤེས་བྱ་རྟག་པ་ཡིན་པ་སོགས་ནི་འཐད་པ་ཡིན་པའི་རིགས་པ།

3 མེས་བུད་ཤིང་བསྲེགས་པ་ནི་བྱ་བ་བྱེད་པའི་རིགས་པ།

4 ཆོས་ཉིད་ཀྱི་རིགས་པ་ལ། འཇིག་རྟེན་ལ་སྣང་བའི་རིགས་པ། བསམ་གྱིས་མི་ཁྱབ་པའི་རིགས་པ། གནས་པའི་རིགས་པ་དང་གསུམ། དང་བོ་ནི་མེ་གྱེན་དུ་འབར་བ་དང་ཆུ་ཐུར་དུ་བཞུར་བ། མེ་ཚ་བ། ཆུ་བརླན་པ། རླུང་གཡོ་བ་སོགས་ཡིན། གཉིས་པ་ལ་ལས་ཀྱི་ནུས་པ་བསམ་གྱིས་མི་ཁྱབ་པ། སངས་རྒྱས་ཀྱི་མཐུ་བསམ་གྱིས་མི་ཁྱབ་པ། རིག་སྔགས་ཀྱི་ནུས་པ་བསམ་གྱིས་མི་ཁྱབ་པ། མཁྱུད་དཔྱད་ཀྱི་ནུས་པ་བསམ་གྱིས་མི་ཁྱབ་པ་དང་བཞི་ཡོད། གསུམ་པ་གནས་པའི་རིགས་པ་ནི་བུམ་པ་བདེན་མེད་བུམ་པའི་ཆོས་ཉིད་དུ་གནས་པ་ལས་སྒྲུབ་བྱེད་གཞན་མེད་དེ། ཆོས་ཉིད་ཀྱི་རྟེན་འབྲེལ་ཡིན་གསུངས།

མཆན་འགྲེལ།

ལུང་གི་ཆོས་དང་རྟོགས་པའི་ཆོས་ཞེས་ཀྱང་བྱ་སྟེ། སྤྱིར་དྷརྨའི་དོན་ཆོས་ཞེས་པའི་སྒྲ་རྣམ་བཤད་རིགས་པ་ལས།  ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང༌། །འབྱུང་འགྱུར་ངེས་དང་ཆོས་ལུགས་ལའོ། །ཞེས་གསུངས་པ་ལྟར་དོན་བཅུ་ལ་འཇུག་པ་ལས་ཤེས་བྱ་ལ་འཇུག་པ་འདུས་བྱས་སུ་གྱུར་པའི་ཆོས་ཞེས་པ་ལྟ་བུ། ལམ་ལ་འཇུག་པ་ཡང་དག་པའི་ལྟ་བ་ཆོས་ཞེས་པ་ལྟ་བུ། མྱང་འདས་ལ་འཇུག་པ་ཆོས་ལ་སྐྱབས་སུ་མཆི་ཞེས་པ་ལྟ་བུ། ཡིད་ཀྱི་ཡུལ་ལ་འཇུག་པ་ཆོས་ཀྱི་སྐྱེ་མཆེད་ཅེས་པ་ལྟ་བུ། བསོད་ནམས་ལ་འཇུག་པ་བཙུན་མོའི་འཁོར་དང་ལྷན་ཅིག་ཏུ་ཆོས་སྤྱོད་ཅེས་པ་ལྟ་བུ། ཚེ་ལ་འཇུག་པ་བྱིས་པས་མཐོང་བའི་ཆོས་གཅེས་པར་འཛིན་ཅིང་པ་ལྟ་བུ། གསུང་རབ་ལ་འཇུག་པ་ཆོས་ཞེས་པ་མདོ་སྡེ་ཞེས་པ་ལྟ་བུ། འབྱུང་འགྱུར་ལ་འཇུག་པ་ལུས་འདི་རྒ་བའི་ཆོས་ཅན་ཞེས་པ་ལྟ་བུ། ངེས་པ་ལ་འཇུག་པ་དགེ་སྦྱོང་གི་ཆོས་ཞེས་པ་ལྟ་བུ། ཆོས་ལུགས་ལ་འཇུག་པ་རིགས་ཀྱི་ཆོས་ཞེས་པ་ལྟ་བུ་སྟེ། དེའི་ཚིག་ཟུར་གྱི་ཆོས་བཅུ་རིམ་པ་ལྟར་ཤེས་བྱ་དང༌། ལམ་དང༌། མྱང་འདས་དང༌། ཡིད་ཀྱི་ཡུལ་དང༌། བསོད་ནམས་དང༌། ཚེ་དང༌། གསུང་རབ་དང༌། འབྱུང་འགྱུར་དང༌། ངེས་པ་དང༌། ཆོས་ལུགས་བཅུ་ལ་གོ་དགོས་སོ། །འདི་དག་ཆེ་ལོང་དུ་བསྡུས་པ་སྟེ། བློ་ཡི་ཆོས་དང༌། ཡང་དག་པའི་ཆོས་ཞེས་པ་ལྟ་བུ་གཞན་ཡང་མང་ངོ༌། །

འདི་ནི་ཀུན་མཁྱེན་བླ་མའི་བཞེད་པ་ལྟར་བྲིས་པ་སྟེ་པཎ་ཆེན་བསོད་ནམས་གྲགས་པས་བཀའ་དང་བསྟན་བཅོས་གཉིས་འགལ་བ་དང་ཕྱི་རོལ་པའི་བསྟན་བཅོས་ཡིན་ཀྱང་བསྟན་བཅོས་ཀྱི་སྒྲ་བཤད་མི་ཚང་ལ། བཀའ་ལ་སངས་རྒྱས་ཀྱི་གསུང་གིས་ཁྱབ་པས་ཤཱ་རིའི་བུའི་ངག་ཏུ་གྱུར་པའི་བརྒྱད་སྟོང་པ་སངས་རྒྱས་ཀྱི་གསུང་ཡིན་ཀྱང་དེའི་ངག་མིན་པར་གསུངས་པས་གང་བདེར་གཟུང་བར་བྱའོ། །

        བཀའ་འགྱུར་ནི་སྟོན་པ་སངས་རྒྱས་རིང་ལ་སངས་རྒྱས་ཀྱི་གསུང་རབ་འགའ་ཞིག་ཡི་གེར་བྲིས་ཏེ་དད་ལྡན་རྣམས་ཀྱིས་མཚན་མོའི་སྒྲོན་འོད་ལ་བརྟེན་ནས་ཀློག་པ་ཡོད་ཀྱང་ཕྱོགས་གཅིག་ཏུ་ཕྱོགས་  བསྒྲིགས་བྱས་པའི་གླེགས་བམ་མེད། རིམ་བཞིན་བཀའ་སྡུད་པ་གསུམ་ལ་སོགས་པས་ཕྱོགས་བསྒྲིགས་བྱས་པ་དག མུ་སྟེགས་པ་དང་ཁ་ཆེའི་ཆོས་ལུགས་དག་གིས་རྩ་མེད་རང་བཞིན་ལྡན་པའི་གཏོར་བཤིག་ཐེངས་གསུམ་བྱུང་སྐབས་མེར་བསྲེགས་ཏེ་མེད་པར་གྱུར། བཙན་པོ་སྲོང་བཙན་སྒམ་པོ་ནས་རིམ་བཞིན་རྒྱ་གར་ནག་ཏུ་བསྒྱུར་བ་རྣམས་དཀར་ཆག་འཕང་ཐང་མ་དང་ལྡན་དཀར་མ། མཆིམས་ཕུ་མ་རྣམས་སུ་བཀོད། 1312ལོ་ནས་སྣར་ཐང་གི་དགེ་བཤེས་མཁས་པ་འཇམ་གག་པ་པཀྵི་བླ་མར་གདན་དྲངས་ནས་རང་གི་བླ་མ་བཅོམ་ལྡན་རིག་རལ་ལ་ཤོག་བུ་སྣག་ཚ་ཕུལ་ནས་བསྐུལ་བས་བཅོམ་ལྡན་རིག་རལ་དང་དབུས་པ་བྱང་ཆུབ་བློ་གསལ་སོགས་ཀྱིས་དབུས་གཙང་དང་མངའ་རིས་སོགས་སུ་བཀའ་བསྟན་གྱི་མ་དཔེ་འཚོལ་བསྡུ་གནང་ཐོག་ཞུ་དག་དང་ལེགས་སྒྲིག་བྱས་ཏེ་དཀར་ཆག་རྒྱས་འབྲིང་བསྡུས་གསུམ་མཛད་ནས་བཀའ་འགྱུར་དཀར་ཆག་དང༌། དཔར་ཤིང་མང་བོ་བྱུང༌། དེ་ལས་སྡེ་དགེ་བསྟན་འགྱུར་ལ་པོ་ཏི་བརྒྱ་དང་གསུམ་ཡོད་ཅིང་མདོའི་སྡེ་ཚན་དང༌། སྔགས་ཀྱི་སྡེ་ཚན་གཉིས་སུ་ཕྱེས་ཡོད། མདོའི་སྡེ་ཚན་ལ་འཁོར་ལོ་དང་བོ་འདུལ་བ་ལུང་གི་སྐོར་དང་འཁོར་ལོ་བར་བ་ཤེར་ཕྱིན་གྱི་སྐོར་མདོ་མང་དུ་གྲགས་པ་ཐེག་པ་ཆེ་ཆུང་གི་མདོ་ཅི་རིགས་ཕྱོགས་གཅིག་ཏུ་བསྒྲིགས་པའི་སྐོར་གསུམ་དུ་ ཕྱེས་ཡོད་ལ་གསང་སྔགས་རྒྱུད་འབུམ་དུ་གྲགས་པའི་སྐོར་ལ་རྣལ་འབྱོར་བླ་མེད་དང༌། རྣལ་འབྱོར་རྒྱུད༌། སྤྱོད་རྒྱུད། བྱ་བའི་རྒྱུད་བཅས་སྡེ་ཚན་བཞིར་ཕྱེས་ཡོད།

བསྟན་འགྱུར་ནི་རྒྱ་གར་ནག་གི་བསྟན་བཅོས་བོད་དུ་འགྱུར་བ་ཡིན་ཀྱང༌། དེའི་མཇུག་ཏུ་བོད་མིས་བརྩམས་པའི་བསྟན་བཅོས་ཀྱང་མི་ཉུང་བ་ཞིག་ཡོད། ཡིན་ནའང༌། ཕྱིས་སུ་དེའི་ནང་དུ་བོད་ཀྱི་ བསྟན་བཅོས་གཞུག་མི་ཆོག་པའི་བཀས་བཅད་མཛད། བསྟན་འགྱུར་གྱི་དཀར་ཆག་མཛད་ཚུལ་སོགས་བཀའ་འགྱུར་དང་འདྲ་ལ། བསྟན་འགྱུར་དཀར་ཆག་ཐོག་མ་སྣར་ཐང་བཀའ་འགྱུར་དང་འདྲ་ལ་སྡེ་དགེའི་བསྟན་འགྱུར་ལྟར་ན། བསྟོད་ཚོགས། རྒྱུད། ཤེར་ཕྱིན། དབུ་མ། མདོ་སྡེ། སེམས་ཙམ། མངོན་པ། འདུལ་བ། སྐྱེས་རབས། འཁྲི་ཤིང༌། སྤྲིངས་ཡིག སྒྲ་མདོ། གསོ་རིག སྣ་ཚོགས་བཅས་སྡེ་ཚན་བཅོ་བརྒྱད་ལ་པོ་ཏི213བཞུགས།

ཆོས་འཁོར་ནི་འཁོར་ལོ་རིན་པོ་ཆེ་དང་བྱེད་ལས་ཆོས་མཚུངས་པའི་ཆོས་འཁོར་ཏེ། བྱེ་སྨྲས་མཐོངལམ་ཁོ་ན་ཆོས་འཁོར་ཏེ་མཐོང་ལམ་ལ་བདེན་པ་མྱུར་དུ་རྟོགས་པས་མྱུར་དུ་འགྲོ་བ། བདེན་པ་སྔ་མའི་དམིགས་རྣམ་འདོར་བ་དང་ཕྱི་མ་འཇུག་པ། བར་ཆད་མེད་ལམ་གྱིས་སྤང་བྱའི་ཐོབ་པ་གཅོད་པས་མ་རྒྱལ་བ་ལས་རྒྱལ་བར་བྱེད་པ་དང༌། རྣམ་གྲོལ་ལམ་གྱིས་སྤང་བྱ་དང་བྲལ་བའི་ཐོབ་པ་འདྲེན་པས་རྒྱལ་བ་རྣལ་དུ་འགོད་པ། ཁམས་གོང་མའི་བདེན་པ་ལ་དམིགས་པས་འཕར་བ། འོག་མའི་བདེན་པ་ལ་དམིགས་པས་འབབ་པ་སྟེ་དྲུག་གིས་ཆོས་མཐུན་པར་བཞེད། བཙུན་པ་དབྱངས་སྒྲོག་ནི་འཕགས་ལམ་བརྒྱད་ཆོས་འཁོར་ཡིན། འཁོར་ལོ་ལ་ཡོད་པའི་ལྟེ་བ། གཅོད་པའི་རྩིབས། སྡུད་པའི་མུ་ཁྱུད་དང་ཆོས་མཐུན་པ་ཡིན་ཕྱིར་ཏེ་ངག་ལས་མཐའ་འཚོ་བ་གསུམ་ལྟེ་བ་དང་མཐུན་ཏེ་དེ་གསུམ་ཚུལ་ཁྲིམས་ཀྱི་བསླབ་པ་ཡིན་པས་ཏིང་ངེ་འཛིན་དང་ཤེས་རབ་ཀྱི་རྟེན་བྱེད་ཅིང༌། ལྟ་བ། རྟོག་པ། རྩོལ་བ་གསུམ་རྩིབས་དང་མཐུན་ཏེ་ཤེས་རབ་ཀྱི་བསླབ་པ་ཡིན་པས་མི་མཐུན་ཕྱོགས་གཅོད་པའི་ཕྱིར། ཏིང་ངེ་འཛིན་མུ་ཁྱུད་དང་མཐུན་ཏེ་ལྟ་བ་སོགས་རྩེ་གཅིག་པའི་ཚུལ་གྱིས་དམིགས་པ་ལ་འཛིན་པའི་ཕྱིར་རོ་ཞེས་བཞེད་དོ།།

མངོན་རྟོགས་རྒྱན་སོགས་བྱམས་ཆོས་དང་འབྲེལ་བའི་ཆོས་ཉི་ཤུ་ཡོད་དེ། བྱམས་ཆོས་སྡེ་ལྔ་དང་ཐོགས་མེད་ཀྱི་ས་སྡེ་ལྔ། སྡོམ་རྣམ་གཉིས། དབྱིག་གཉེན་གྱི་པྲ་ཀ་ར་ཎ་སྡེ་བརྒྱད་དེ་ས་སྡེ་ལྔ་ལས་གང་ཟག་གཅིག་ལམ་སྒྲུབ་པའི་མཐུན་ཕྱོགས་ཀྱི་རིམ་པ་སྟོན་པ་སའི་དངོས་གཞི་དང༌། དེའི་དོན་གཙོ་བོར་གཏན་ལ་འབེབ་པ་རྣམ་པར་གཏན་ལ་དབབ་པ་བསྡུ་བ་གཉིས་བརྗོད་བྱ་དོན་གྱི་ཆ་གཙོ་བོར་གཏན་ལ་འབེབ་པ་ཡིན་ལ། ཚིག་གི་ཆ་སྡེ་སྣོད་གསུམ་དུ་བསྡུས་པའི་གཞི་བསྡུ་བ། ཀུན་བྱང་གི་རྣམ་གྲངས་སྟོན་པའི་རྣམ་གྲངས་བསྡུ་བ་གཉིས་ནི་རྗོད་བྱེད་ཚིག་གི་ཆ་བརྟག་པའི་དབང་དུ་བྱས་པ་ཡིན། རྣམ་པར་བཤད་པའི་སྒོ་བསྡུ་བ་ནི་ཚིག་དོན་གཉིས་ཀ་སྦྱར་ནས་འཆད་ཉན་གྱིས་གཏན་ལ་འབེབ་ཚུལ་ཡིན། པྲ་ཀ་ར་ཎ་སྡེ་བརྒྱད་ནི་མདོ་སྡེ་རྒྱན་གྱི་འགྲེལ་བ་དང༌། དབུས་མཐའ་རྣམ་འབྱེད་ཀྱི་འགྲེལ་བ། ཆོས་ཉིད་རྣམ་འབྱེད་ཀྱི་འགྲེལ་བ། རྣམ་བཤད་རིག་པ། ལས་གྲུབ་པའི་རབ་བྱེད། ཕུང་བོ་ལྔའི་རབ་བྱེད། ཉི་ཤུ་ བའི་རབ་བྱེད། སུམ་ཅུ་བའི་རབ་བྱེད་དེ་བརྒྱད་དོ།།ཁ་ཅིག་གིས་ཆོས་ཉིད་རྣམ་འགྲེལ་མི་འདྲེན་པར་རྟེན་འབྲེལ་མདོ་འགྲེལ་འདྲེན་ནོ།།

        སེམས་ཙམ་པའི་ལུགས་ཀྱི་ལྟ་བའི་གནད་ཤེས་པ་ལ་ཐོག་མར་བག་ཆགས་ལ་གོ་བ་ཆགས་དགོས་ཏེ། སྤྱིར་བག་ཆགས་ལ་མངོན་པར་བརྗོད་པའམ་སྤྲོས་པའི་བག་ཆགས། བདག་ལྟའམ་འཇིག་ལྟའི་བག་ཆགས། སྲིད་པའི་ཡན་ལག་གི་བག་ཆགས། རིགས་མཐུན་ཀྱི་བག་ཆགས་དང་བཞི་ཡོད་པའི་ཕྱིར། དང་བོ་མངོན་པར་བརྗོད་པའམ་སྤྲོས་པའི་བག་ཆགས་ནི། སྔོན་འཛིན་མིག་ཤེས་ལ་སྔོན་པོ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པར་སྣང་བ་ལ་དབང་བྱེད་པའི་བག་ཆགས་ལྟ་བུ་སྟེ། མདོར་ན་འདི་ནི་ཤེས་པ་ལ་ཡུལ་གྱི་སྤྲོས་པ་སྣ་ཚོགས་འཆར་བར་བྱེད་པའི་ལས་ཅན་ཞིག་གོ། དེ་ཡང་འཁོར་བ་ཐོག་མ་མེད་པ་ནས་ཡིད་ཤེས་གཙོ་འཁོར་དང་བཅས་པས་ཡུལ་སྣ་ཚོགས་ཡུལ་ལ་བྱེད་ཅིང་བསམ་པ་རྒྱུ་ཞིང་འཇུག་པ་ལ་ཡིད་ཀྱིས་མངོན་པར་བརྗོད་པ་ཞེས་བྱ་སྟེ་བུམ་པ་ཞེས་བརྗོད་པའི་སྒྲས་བུམ་པ་བརྗོད་པ་བཞིན་ནོ། །གཉིས་པ་བདག་ལྟའམ་འཇིག་ལྟའི་བག་ཆགས་ནི་བདག་གཞན་རིས་སུ་བཅད་ནས་འཛིན་པའི་བདག་ཏུ་འཛིན་པའི་ལྟ་བ་བསྐྱེད་པ་ལ་དབང་བྱེད་པའི་བག་ཆགས་དང༌། གསུམ་པ་སྲིད་པའི་ཡན་ལག་གི་བག་ཆགས་ནི། དགེ་བ་དང་མི་དགེ་བའི་བག་ཆགས་ཏེ་སྲིད་པའམ་འཁོར་བར་སྐྱེ་འཆི་སྣ་ཚོགས་སྒྲུབ་པར་བྱེད་པའི་ནུས་པའོ། །དེས་ན་སོ་སྐྱེས་རྒྱུད་ཀྱི་མངོན་སུམ་རྣམས་ནི་དེ་ལྟ་བུའི་རིགས་མཐུན་ཀྱི་བག་ཆགས་དང་མངོན་པར་བརྗོད་པའི་བག་ཆགས་འཁོར་བ་ཐོག་མ་མེད་པ་ནས་བསགས་ཤིང་བརྟན་པར་བྱས་པ་ལས་བྱུང་བའི་མི་བསླུ་བ་ཞེས་བརྗོད་པའི་ཕྱིར་རོ། །བཞི་བ་རིགས་མཐུན་གྱི་བག་ཆགས་ནི་སྔོན་འཛིན་མིག་ཤེས་སྔོན་པོ་སྔོན་པོ་སྣང་བ་ལ་དབང་བྱེད་པའི་བག་ཆགས་ལྟ་བུའོ། །དེ་ཡང་བདག་འཛིན་གང་ཟག་གི་བདག་འདྲའི་རྣམ་པ་འཆར་བ་དེ་བདག་ལྟའི་བག་ཆགས་ཀྱི་དབང་གིས་དང༌། སྔོན་འཛིན་མིག་ཤེས་ལ་སྔོན་པོ་སྔོན་པར་སྣང་བ་རིགས་མཐུན་གྱི་བག་ཆགས་ཀྱི་དབང་གིས་དང༌། ཡུལ་གཅིག་ལ་བརྟེན་ནས་སྤྲོས་པ་སྣ་ཚོགས་སུ་འཆར་བ་ནི་མངོན་པར་བརྗོད་པའི་ བག་ཆགས་ཀྱི་དབང་གིས་དང༌། མངོན་ཤེས་ལ་ཡུལ་ཤར་བ་ནི་རང་གི་བདག་རྐྱེན་ཞི་ལྷག་ཟུང་འབྲེལ་གྱི་དབང་གིས་དང༌། རྣམ་མཁྱེན་ལ་ཡུལ་རྣམས་འཆར་བ་ཚོགས་གཉིས་ཀྱི་ནུས་པའི་དབང་གིས་འཆར་བའི་ཕྱིར། ཤེས་པ་ཡིན་ན་ཁྱོད་ཀྱི་དམིགས་རྐྱེན་བདག་རྐྱེན་དེ་མ་ཐག་རྐྱེན་གསུམ་ག་ཡོད་པས་ཁྱབ་པས་ན་རྟོག་པ་ཐམས་ཅད་ཀྱི་དམིགས་རྐྱེན་ལ་བག་ཆགས་རེ་འཇོག་དགོས་ཏེ་རྟོག་པ་ཡུལ་གྱི་རྣམ་པ་ཡང་བག་ཆགས་ཀྱི་དབང་གིས་འཆར་དགོས་པས་ཁྱབ་པའི་ཕྱིར་རོ།།

བསྟན་བཅོས་ལ་ཁྱད་པར་བཞི་དང་ལྡན་ཏེ། མཐོ་རིས་དང་ཐར་བ་འཐོབ་པའི་ཐབས་སོགས་བརྗོད་པས་བརྗོད་བྱ་དོན་དང་ལྡན་པ། ཚིག་སྔ་ཕྱིའི་འབྲེལ་ཆགས་པས་རྗོད་བྱེད་ཚིག་གི་སྐྱོན་དང་བྲལ་བ། ཁམས་གསུམ་གྱི་ཉོན་མོངས་ཅི་རིགས་སྤང་ཕྱིར་དུ་གསུངས་པས་དེ་སྤང་བར་འགྱུར་བའི་བྱེད་ལས་ཅན། དགོས་པ་ཉོན་མོངས་པ་དང་སྡུག་བསྔལ་ཞི་བའི་ཕན་ཡོན་སྟེ་བཞི་ཡིན་ལ་འདི་ལྡན་པར་ཁྱད་པར་བཞི་ལྡན་གྱི་གསུང་རབ་ཟེར་རོ།།

 


上一篇:བྱིའུ་སྒང་པའི་ལུགས་ཀྱི་ཐང་ག འབྲི་རྒྱུན་རྙིང་པར་གསོན་ཤུགས་གསར་པ་རྒྱས།

下一篇:སྐད་གཉིས་གསར་འགྱུར་ལས་ཨ་ཆེན་གངས་རྒྱབ་འཛམ་གླིང་རང་བྱུང་ཤུལ་བཞག་ནང་སྙན་ཞུ་བྱས་པའི་མཇུག་འབྲས་ཟླ༧པའི་ཚེས༧ཉིན་ནས་ཚེས༩ཉིན་བར་ཁྱབ་བསྒྲགས་བྱ་རྒྱུ་རེད།

版权所有:西藏民族大学图书馆 更新

地址:陕西省咸阳市文汇东路六号 邮编:712082 电话:029-33755418 邮箱:lib@xzmu.edu.cn

您是第 1790176 位访客