དཔའ་བོ་གཙུག་ལག་ཕྲེང་བ།

发布时间:2017-07-03 02:42:19

     དཔའ་བོ་གཙུག་ལག་ཕྲེང་བ་ནི་རབ་བྱུང་བརྒྱད་པའི་ཤིང་བྱི་སྤྱི་ལོ་༡༥༠༤ལོར་གཉགས་རིགས་ལས་བྱུང་བ་ཡབ་བླ་མ་དར་དང་། ཡུམ་ལམ་རྙེད་སྒྲོལ་མ་གཉིས་ཀྱི་སྲས་སུ་སྙེ་ཐང་དུ་སྐུ་འཁྲུངས། དགུང་ལོ་ལྔ་པར་དགེ་བསྙེན་ཆ་ལུང་པས་དཔའ་བོ་སྐུ་ཕྲེང་དང་པོ་ཆོས་དབང་ལྷུན་གྲུབ་ཀྱི་སྐུ་སྐྱེར་ངོས་འཛིན་ཞུས་ཏེ་ལྷོ་བྲག་གྲོ་བོ་དགོན་པའི་གདན་སར་སྤྲན་དྲངས། བླ་མ་རྟོགས་ལྡན་དགེ་འདུན་རྒྱ་མཚོ་དགེ་རྒན་དུ་བསྟེན་ནས་བོད་ཡིག་འབྲི་ཀློག་སོགས་ལ་སྦྱང་བརྩོན་མཛད།
      དགུང་ལོ་དགུ་པ་ལ་ཀརྨ་ཞྭ་དམར་སྐུ་ཕྲེང་བཞི་པ་ཆོས་ཀྱི་གྲགས་པའི་དྲུང་ནས་དགེ་བསྙེན་དང་དགེ་ཚུལ་གྱི་སྡོམ་པ་བཞེས་པའི་མཚན་ལ་མི་ཕམ་ཆོས་ཀྱི་རྒྱ་མཚོ་ཞེས་གསོལ། དགུང་ལོ་བཅུ་གཉིས་པར་ཤར་དྭགས་པོ་པཎྜི་ཏ་ཆོས་རྒྱལ་བསྟན་པའི་རྒྱལ་མཚན་གྱི་དྲུང་ནས་གསང་སྔགས་གསར་རྙིང་གི་ཆོས་མང་པོ་དང་། དབུས་སྨྱོན་ཧེ་རུ་ཀ་ཀུན་དགའ་བཟང་བོའི་དྲུང་ནས་ཕྱག་ཆེན་གྱི་ཁྲིད་གསན། དེ་རྗེས་ཞ་ལུ་ལོ་ཆེན་ཆོས་སྐྱོང་བཟང་པོའི་དྲུང་ནས་དགེ་སློང་གི་སྡོམ་པ་བཞེས། དགུང་ལོ་ཉི་ཤུ་རྩ་དགུ་པ་ཀོང་པོར་ཕེབས་སྐབས་ཟིང་པོ་འབུམ་པ་སྒང་དུ་ཀརྨ་པ་མི་བསྐྱོད་རྡོ་རྗེ་དང་མཇལ་ཏེ་ཆོས་འབྲེལ་ཞུས་ཤིང་། མཚན་ལ་དཔའ་བོ་གཙུག་ལག་ཕྲེང་བ་ཞེས་གསོལ།
      དེ་ནས་བཟུང་མདོ་སྔགས་རིག་གནས་དང་བཅས་པའི་གསན་སྦྱོང་མང་ཆེ་བ་བླ་མ་འདིའི་དྲུང་དུ་མཛད་པ་དང་འབྲེལ་མཁས་པའི་དབང་པོ་དུ་མའི་ཞབས་ལ་བཏུགས་ནས་རིག་གནས་སྤྱི་ལ་གསན་སྦྱོང་དཔྱིས་ཕྱིན་པ་གནང་བས་མཁས་པའི་ཕུལ་དུ་ཕྱིན་ཏེ་དཔའ་བོ་གཙུག་ལག་ཕྲེང་བ་ཞེས་སྙན་པའི་གྲགས་པ་རབ་ཏུ་འབར། གསུང་རྩོམ་ལ<<སྤྱོད་འཇུག་འགྲེལ་ཆེན>>དང་། <<རྩིས་ཀྱི་བསྟན་བཅོས>><<ཕག་མོའི་རྣམ་བཤད་ཆེན་མོ>><<གསོ་བ་རིག་པའི་རྒྱུད་བཞིའི་རྣམ་བཤད>><<སྨན་དཔྱད་ཟིན་བྲིས་སྙིང་པོ་བསྡུས་པ>><<རྡོ་ཞུན་གསལ་སྒྲོན>><<རྩིས་གཞུང་རིན་ཆེན་གཏེར་མཛོད>><<ཆོས་འབྱུང་མཁས་པའི་དགའ་སྟོན>>སོགས་མང་དུ་མཆིས། <<ཆོས་འབྱུང་མཁས་པའི་དགའ་སྟོན>>ནི་རབ་བྱུང་དགུ་པའི་ཤིང་སྦྲུལ་༡༥༤༥ལོར་བརྩམ་འགོ་བཙུགས་ཏེ་ལོ་ངོ་ཉི་ཤུ་རྩ་གཅིག་རིང་ཡོངས་སུ་ཆ་ཚང་བར་མཛད། ལོ་རྒྱུས་དེབ་ཐེར་འདི་ཉིད་ཤེས་བྱའི་གནས་ཀུན་ལྟ་བའི་མེ་ལོང་དང་མཚུངས་ཤིང་། ལོ་རྒྱུས་དཔྱད་ཡིག་ཁུངས་བཙན་ཞིག་ཏུ་སྣང་བ་བཅས་དམ་པ་འདི་ཉིད་ཀྱིས་མདོ་སྔགས་རིག་གནས་ཀྱི་མཛད་པ་རྒྱ་ཆེར་སྤེལ་མཐར་དགུང་ལོ་དྲུག་ཅུ་རེ་གསུམ་པ་རབ་བྱུང་དགུ་པའི་མེ་སྟག་ལོ་༡༥༨༨ལོར་སྐུ་གཤེགས།

上一篇:གདོད་མའི་རྣམ་པའི་བོད་མི་རིགས་ཀྱི་རོལ་དབྱངས་ཀྱི་གྲངས་གཞིའི་མཛོད་ཐོག་མ་དེ་བཙུགས་པ།

下一篇:མཁས་དབང་དུང་དཀར་བློ་བཟང་འཕྲིན་ལས་མཆོག་ངོ་སྤྲོད་མདོར་བསྡུས།

版权所有:西藏民族大学图书馆 更新

地址:陕西省咸阳市文汇东路六号 邮编:712082 电话:029-33755418 邮箱:lib@xzmu.edu.cn

您是第 1872306 位访客